గ్యారేజ్ @ 50.. ఎన్ని కేంద్రాల్లో?

డివైడ్ టాక్ తో మొదలైనా.. ఈ ఏడాది టాలీవుడ్ హైయెస్ట్ గ్రాసర్ గా నిలిచింది ‘జనతా గ్యారేజ్’ ఎన్టీఆర్ కెరీర్లో అన్ని కలెక్షన్ల రికార్డులన్నీ ఈ సినిమా తుడిచి పెట్టేసింది. రూ.80 కోట్లకు పైగా షేర్.. రూ.140 కోట్లకు పైగా గ్రాస్ కలెక్ట్ చేసి సంచలనం రేపిందీ చిత్రం. ఇప్పుడు ‘జనతా గ్యారేజ్’ మరో మైలురాయిని అందుకుంది. సరిగ్గా గురువారం నాటికి 50 రోజుల ప్రదర్శన పూర్తి చేసుకుంది. ఒకప్పుడైతే 50 రోజులు.. వంద రోజులు అనగానే ఎన్ని సెంటర్లలో అన్న చర్చ నడిచేది. కానీ ఇప్పుడు మూణ్నాలుగు వారాలకే సినిమాలు థియేటర్ల నుంచి లేచిపోతున్నాయి. 50 రోజుల సెంటర్లు డబుల్ డిజిట్ కు వెళ్లినా ఆశ్చర్యపోవాల్సిందే.

ఐతే ‘జనతా గ్యారేజ్’ ఇలాంటి టైంలోనూ 39 కేంద్రాల్లో 50 రోజులు పూర్తి చేసుకోవడం విశేషం. హైదరాబాద్ సహా చాలా పెద్ద సెంటర్లో ఈ సినిమా అర్ధశత దినోత్సవం పూర్తి చేసుకుంది. ఐతే ఈ ఆదివారమే మా టీవీలో ‘జనతా గ్యారేజ్’ ప్రిమియర్ పడిపోతుండటంతో థియేట్రికల్ రన్ కు ఇంతటితో తెరపడుతున్నట్లే. దాదాపు ఈ సినిమా ఆడుతున్న అన్ని సెంటర్లలోనూ ‘ఇజం’ సినిమాను రీప్లేస్ చేయబోతున్నారు. ‘జనతా గ్యారేజ్’ 50 డేస్ పూర్తి చేసుకున్న సందర్భంగా ఎన్టీఆర్ ట్విట్టర్లో స్పందించాడు. ఇలాంటి అద్భుతమైన.. మరపురాని విజయాన్నందించినందుకు అందరికీ ధన్యవాదాలని.. ముఖ్యంగా దర్శకుడు కొరటాల శివకు పెద్ద థ్యాంక్స్ అని.. ఆయన వల్లే ఈ సినిమా ఇంత పెద్ద విజయం సాధించిందని చెబుతూ ‘జనతా గ్యారేజ్’ యూనిట్ సభ్యులకు అభిమానులకు.. మీడియాకు.. శ్రేయోభిలాషులకు మరోమారు థ్యాంక్స్ చెప్పాడు తారక్.

Like Us on Facebook : https://www.facebook.com/Tupakidotcom/