గెట్ రెడీ.. ఎన్టీఆర్ మటన్ బిరియాని

ఇప్పటికే జూనియర్ ఎన్టీఆర్ మల్టీ టాలెంట్స్ చూశాం. ఇప్పుడు అతడిలోని మరో నైపుణ్యం చూడబోతున్నాం. ‘బిగ్ బాస్’ హౌస్ లో తన పాక శాస్త్ర ప్రావీణ్యాన్ని చూపించబోతున్నాడు తారక్. అతను బిగ్ బాస్ పార్టిసిపెంట్లకు మటన్ బిరియాని వండి పెట్టే ఎపిసోడ్ ఆదివారం ప్రసారం కాబోతోంది. దీనికి సంబంధించిన ప్రోమో బిగ్ బాస్ ఫాలోవర్లలోనే కాక ఎన్టీఆర్ అభిమానులందరిలోనూ ఆసక్తి రేకెత్తిస్తోంది. ఎన్టీఆర్ చెఫ్ లాగా మారిపోయి చాలా చలాకీగా కనిపిస్తున్నాడు ఈ ప్రోమోలో. తెలుగు ‘బిగ్ బాస్’ హిస్టరీలో ఆదివారం నాటి ఎపిసోడ్ అత్యధిక రేటింగ్ తెచ్చుకోగలదని కూడా అంచనా వేస్తున్నారు.

శనివారం నాటి ‘బిగ్ బాస్’ ఎపిసోడ్ కూడా భలే ఆసక్తి రేకెత్తించింది. ఇన్నాళ్లూ హోస్టుగానే ఉన్న ఎన్టీఆర్ తొలిసారి హౌస్ లోపలికి వెళ్లాడు. తన కొత్త సినిమా ‘జై లవకుశ’ ప్రమోషన్ కోసం అన్నయ్య కళ్యాణ్ రామ్.. హీరోయిన్ రాశి ఖన్నా.. నివేదా థామస్ రావడంతో వాళ్లతో కలిసి తారక్ హౌస్ లోపలికి వెళ్లాడు. అక్కడ అన్నదమ్ములిద్దరి సందడి ఆకట్టుకుంది. ఈ సందర్భంగా ఎన్టీఆర్ తన ఇమేజ్ గురించి పట్టించుకోకుండా కింద కూర్చుని అందరిలో ఒకడిలా మారిపోవడం ఆకట్టుకుంది. ఇక ఈ వారం ‘బిగ్ బాస్’ ఎలిమినేషన్ విషయానికి వస్తే ఆదర్శ్ సేఫ్ అయ్యాడు. దీక్షా సేథ్-అర్చన.. ఈ ఇద్దరిలో ఒకరు ఆదివారం ఎలిమినేట్ కాబోతున్నారు. ఇది కూడా ఆదివారం ఎపిసోడ్ పై ఆసక్తిని పెంచేదే.