ఒక్క రూపాయి కూడా తీసుకోని హీరో

కమెడియన్ గా మాంచి ఊపులో ఉండగా ఉన్నట్లుండి హీరో అయిపోయాడు సప్తగిరి. ఆ సినిమానే సప్తగిరి ఎక్స్ ప్రెస్. ఈ సినిమాకు తన వంతుగా చాలానే చేశాడు సప్తగిరి. తమిళంలో హిట్టయిన ‘తిరుడన్ పోలీస్’ను రీమేక్ చేస్తే బాగుంటుందన్న ఆలోచన అతడిదేనట. తెలుగు నేటివిటీకి తగ్గట్లు మార్పుల్లోనూ అతడి భాగస్వామ్యం ఉంది. అందుకే ‘అడిషనల్ స్క్రీన్ ప్లే’ క్రెడిట్ కూడా తీసుకున్నాడు.

ఐతే హీరోగా చేసి.. స్క్రిప్టులోనూ సహకారం అందించిన సప్తగిరి.. ఈ సినిమాకు పారితోషకం మాత్రం తీసుకోలేదట. తాను హీరోగా సినిమా తీయడానికి నిర్మాత రవికిరణ్ ముందుకు రావడమే గొప్ప విషయమని.. అందుకే తనకు ఇచ్చే పారితోషకాన్ని నిర్మాత సినిమాకు ఖర్చు చేసుకుంటాడన్న ఉద్దేశంతో ఒక్క రూపాయి కూడా తీసుకోకుండా సినిమా పూర్తి చేశానని సప్తగిరి తాజాగా ఒక ఇంటర్వ్యూలో వెల్లడించాడు.

ఐతే ‘సప్తగిరి ఎక్స్ ప్రెస్’కు ఓపెనింగ్స్ బాగానే వచ్చాయి ఇప్పుడు. సొంతంగా ఈ చిత్రాన్ని రిలీజ్ చేసుకున్న నిర్మాత లాభాలు అందుకునే అవకాశాలు కూడా ఉన్నాయి. కాబట్టి సప్తగిరికి ఇప్పుడు అందులో కొంచెం వాటా ఇచ్చే అవకాశాలున్నాయి. హీరోగా సప్తగిరి పాసైపోయాడని చెప్పలేం కానీ.. ఉన్నంతలో మెరుగైన ఫలితాన్నే అందుకున్నాడు. టాక్ డివైడ్ గా ఉన్నప్పటికీ కలెక్షన్లయితే బాగానే వస్తున్నాయి ఈ చిత్రానికి. ముఖ్యంగా మాస్ ఏరియాల్లో సినిమా బాగా ఆడుతోంది. పవన్ కళ్యాణ్ ఫ్యాన్స్ ఈ సినిమాకు మంచి సపోర్ట్ ఇస్తుండటం విశేషం

Like Us on Facebook : https://www.facebook.com/Tupakidotcom/