ఆభరణం కొందరికి నచ్చింది -నిఖిల్

శంకరాభరణం అంచనాలను అందుకోలేకపోయిందన్న మాట వాస్తవమే. క్లాసిక్ టైటిల్ ను చెడగొట్టారనే చెడ్డ పేరు కూడా వచ్చింది. దీంతో డ్యామేజ్ కంట్రోల్ కోసం రంగంలోకి దిగింది యూనిట్. జనాల్లో తిరగడం మొదలుపెట్టారు. సినిమా ఆడుతున్న థియేటర్లలో చక్కర్లు కొడుతున్నారు.

సండే రోజున హైద్రాబాద్ లోని కొన్ని థియేటర్లలో సందడి చేశాడు హీరో నిఖిల్. సినిమా సూపర్ - అదుర్స్ లాంటి మాటలు మాట్లాడకుండా.. "శంకరాభరణం మూవీకి కొన్ని లోటు పాట్లు ఉన్న మాట వాస్తవమే. అయితే మా టార్గెట్ ఆడియన్స్ ని అందుకోగలిగాం. మూవీలోని ఎంటర్టెయిన్మెంట్ ని జనాలు ఎంజాయ్ చేస్తున్నారు" అంటున్నాడు. అంతే కాదు.. రిలీజ్ అయిన మూడో రోజున కూడా థియేటర్స్ ఫుల్ అవుతున్నాయంటూ కొన్ని పిక్స్ ని కూడా పోస్ట్ చేశాడు.

ఇంతే కాదు మరిన్ని ఆసక్తికర విషయాలను కూడా ట్విట్టర్ ద్వారా షేర్ చేసుకున్నాడు నిఖిల్. తన కెరీర్ లో అత్యధిక ఓపెనింగ్ వసూళ్లు సాధించిన చిత్రంగా శంకరాభరణం రికార్డ్ సృష్టించిందని, ప్రేక్షకులు తనపై ఇంతగా నమ్మకం ఉంచినందుకు థాంక్స్ కూడా చెప్పాడు. నిర్మాత చెబుతున్న కలెక్షన్ అంకెలను చూస్తుంటే.. తనకు ఎంత గుడ్ విల్ ఉందో అర్ధమైందంటున్నాడు నిఖిల్. అంటే.. తొలి రోజున తెలుగు రాష్ట్రాల్లో వచ్చిన 1.4 కోట్ల వసూళ్లు మొత్తం తన ప్రతిభే అని క్లెయిమ్ చేసుకుంటున్నాడా అనిపిస్తోంది కదూ.