స్టార్ క‌మెడియ‌న్ త‌న‌యుడి కొత్త ప్ర‌య‌త్నం

హాస్య న‌టుడు బ్ర‌హ్మానందం త‌న‌యుడు రాజా గౌత‌మ్ విభిన్న‌మైన చిత్రాల‌తో హీరోగా ఆక‌ట్టుకోవాల‌ని ప్ర‌య‌త్నాలు చేస్తున్నారు. కొంత విరామం త‌రువాత ఆయ‌న మ‌రో స‌రికొత్త ప్ర‌య‌త్నంతో త‌న అదృష్లాన్ని ప‌రీక్షించుకోబోతున్నారు. నేడు రాజా గౌత‌మ్ పుట్టిన రోజు.

ఈ సంద‌ర్భంగా ఆయ‌న న‌టిస్తున్న తాజా చిత్రానికి సంబంధించిన గ్లింప్స్ ని మేకర్స్ బుధ‌వారం విడుద‌ల చేశారు. కాన్సెప్ట్ ఓరియెంటెడ్ చిత్రాల‌ని నిర్మిస్తూ వినూత్న‌మైన సినిమాల‌ని అందిస్తున్న య‌స్ ఒరిజినల్స్ ప్రొడ‌క్ష‌న్ నెం.10 గా ఈ చిత్రాన్ని నిర్మిస్తోంది.

ఈ చిత్రం ద్వారా సుబ్బు చెరుకూరి ద‌ర్శ‌కుడిగా ప‌రిచ‌యం అవుతున్నారు. బుధ‌వారం విడుద‌ల చేసిన గ్లింప్స్ ఆక‌ట్టుకుంటోంది. బ్లాక్ థీమ్ లో మొద‌లైన గ్లింప్స్ .. `ఒంట‌రి త‌నం ఎంత భ‌యంక‌రంగా వుంటుందో తెలుసా` అంటూ గౌత‌మ్ వినిపించే డైలాగ్ తో ముగిసింది. ఈ గ్లింప్స్ లో గౌత‌మ్ లుక్ ని రివీల్ చేశారు. ఆర్టిస్ట్ పాత్ర‌లో న‌టించి `మ‌ను` మూవీతో ఆక‌ట్టుకున్న రాజా గౌత‌మ్ ఈ సారి మ‌రో స‌రికొత్త క‌థ‌తో మ‌రో ప్ర‌య‌త్నానికి శ్రీ‌కారం చుట్టినట్టుగా తెలుస్తోంది.

మోనో ఫోబియాతో బాధ‌ప‌డుతున్న ఓ ర‌చ‌యిత‌గా రాజా గౌత‌మ్ ఈ చిత్రంలో క‌నిపించ‌బోతున్నాడు. ఒక ప్ర‌మాదం అత‌ని జీవితాన్ని ఎలా మార్చింది? .. త‌ను ఎదుర్కొంటున్న స‌మ‌స్య మ‌రో పెద్ద స‌మస్యకు కార‌ణం అయితే దాన్ని త‌ను ఎలా అధిగ‌మించాడు? అనేది థ్రిల్లింగ్ గా వుండ‌బోతోంది అని చిత్ర బృందం చెబుతోంది. ఈ కాన్సెప్ట్ ని తెర‌కెక్కించ‌డంలో ద‌ర్శ‌కుడు సుబ్బు చెరుకూరి త‌న‌దైన ప్ర‌త్యేక‌త‌ని చాటుకున్నాడ‌ని అంటున్నారు.

వినూత్న‌మైన క‌థ‌తో కొత్త పంథాలో చేస్తున్న ఈ ప్ర‌య‌త్నాన్ని ఎస్ ఒరిజిన‌ల్స్ బ్యాన‌ర్ పై సృజ‌న్ ఎర‌బోలు నిర్మిస్తున్నారు. షూటింగ్ చివ‌రి ద‌శ‌కు చేరుకుంది. ప్ర‌స్తుతం చివ‌రి షెడ్యూల్ జ‌రుపుకుంటోంది. ఎమ్ ఎస్ జోన్స్ రూపెర్ట్ సంగీతం అందిస్తున్న ఈ చిత్రానికి మోహ‌న్ చారి సినిమాటోగ్ర‌ఫీ అందిస్తున్నారు. రాజా గౌత‌మ్ చేస్తున్న స‌రి కొత్త ప్ర‌య‌త్నం అత‌న్ని స‌క్సెస్ బాట ప‌ట్టించి హీరోగా నిల‌బెడుతుందా? అన్న‌ది వేచి చూడాల్సిందే అంటున్నారు.