ఆగస్టులో స్నేహితుల బాక్సాఫీస్‌ వార్‌

నాని మరియు శర్వానంద్‌ మంచి స్నేహితులు అనే విషయం తెల్సిందే. ఇద్దరు కూడా ఒకరి సినిమాల వేడుకలకు ఒకరు హాజరు అవుతూ వచ్చారు. వీరిద్దరి మద్య మంచి సన్నిహిత్యం ఉండటంతో వీరి సినిమాల విడుదల విషయంలో ఇంత కాలం ఎప్పుడు కూడా క్లాష్‌ రాకుండా చూసుకున్నారు. అయితే మొదటి సారి వీరిద్దరు బాక్సాఫీస్‌ వద్ద పోటీ పడబోతున్నట్లుగా అనిపిస్తోంది. వీరి పోటీకి వచ్చే ఆగస్టు నెల వేదిక అయ్యేలా ఉందని సినీ విశ్లేషకులు అభిప్రాయం వ్యక్తం చేస్తున్నారు.

ఇటీవలే ప్రారంభం అయిన నాని, విక్రమ్‌ కుమార్‌ ల మూవీ ఆగస్టు నెలలో విడుదల చేయబోతున్నట్లుగా అఫిషియల్‌ గా అనౌన్స్‌ మెంట్‌ వచ్చింది. నిన్న నాని పుట్టిన రోజు సందర్బంగా సినిమాకు గ్యాంగ్‌ లీడర్‌ అనే టైటిల్‌ ను ఖరారు చేయడంతో పాటు ఆగస్టు లో మూవీ ఉంటుందని ప్రకటించారు. ఆగస్టు 15న సాహో మూవీ విడుదల కానుంది. కనుక సాహో విడుదలైన రెండు వారాలకు ఈ చిత్రం విడుదలయ్యే అవకాశం ఉంది. అంటే ఆగస్టు 29 లేదా 30న ఈ చిత్రం విడుదల ఉంటుందనిపిస్తుంది.

ఇక శర్వానంద్‌ తమిళ బ్లాక్‌ బస్టర్‌ మూవీ '96' రీమేక్‌ లో నటిస్తున్న విషయం తెల్సిందే. దిల్‌ రాజు నిర్మాణంలో రూపొందబోతున్న ఈ రీమేక్‌ లో సమంత హీరోయిన్‌ గా నటించనుంది. ఈ రీమేక్‌ ను ఆగస్టులో విడుదల చేయాలని దిల్‌ రాజు భావిస్తున్నాడట. దిల్‌ రాజు అనుకుంటే ఖచ్చితంగా ఆ టైం కు విడుదల చేస్తాడు. ఈ సినిమా కూడా సాహో విడుదలైన తర్వాతే ప్రేక్షకుల ముందుకు వచ్చే అవకాశం ఉంది. అంటే రెండు కూడా ఒకే రోజు లేదంటే ఒక్క రోజు తేడాతో ప్రేక్షకుల ముందుకు వచ్చే అవకాశం ఉందన్నమాట. మరి ఈ స్నేహితుల బాక్సాఫీస్‌ వార్‌ లో ఎవరు గెలిచేనో చేడాలి.