2023లో మోక్ష‌జ్ఞ ఎంట్రీ.. సూప‌ర్ హీరోగా సంచ‌ల‌నాల‌కు రెడీ!

న‌ట‌సింహా నంద‌మూరి బాల‌కృష్ణ న‌ట‌వార‌సుడు మోక్ష‌జ్ఞ సినీ ఎంట్రీ గురించి ఐదారేళ్లుగా నిరంత‌రం క‌థ‌నాలు వస్తున్న సంగ‌తి తెలిసిందే. కానీ మోక్ష‌జ్ఞ ఎంట్రీ అంత‌కంత‌కు ఆల‌స్య‌మ‌వుతోంది. అయితే మోక్షు గురించి నంద‌మూరి కాంపౌండ్ భారీ ప్ర‌ణాళిక‌ల్లో ఉండ‌డ‌మే ఈ ఆల‌స్యానికి కార‌ణ‌మ‌ని తెలుస్తోంది. మోక్ష‌జ్ఞ ఎంట్రీ న‌భూతోన‌భ‌విష్య‌తి అన్న చందంగా ఉండాల‌న్న‌ది బాల‌కృష్ణ ప్లాన్. అందుకు త‌గ్గ‌ట్టే ఇప్ప‌టికే క‌థ‌ను కూడా లాక్ చేసి టైటిల్ ని ఫిక్స్ చేసేశారు. అయితే ఈ మూవీ 2022లో నే ప్రారంభ‌మ‌య్యేందుకు ఆస్కారం ఉంద‌ని తెలుస్తోంది.

ఆదిత్య 369 సీక్వెల్ ప‌నులు సాగుతున్నాయ‌ని ఇటీవ‌ల‌ నందమూరి బాలకృష్ణ ధృవీకరించారు. నేడు ఆదిత్య 369 చిత్రం 30 వ వార్షికోత్సవం సంద‌ర్భంగా బ్లాక్ బస్టర్ సైన్స్ ఫిక్షన్ థ్రిల్లర్ సీక్వెల్ గురించి కొన్ని ఆసక్తికర విషయాల్ని వెల్ల‌డించారు. ``ఆదిత్య 369 ప్రధాన క‌థాంశం ఇప్పటికే లాక్ అయ్యింది. నేను ఇప్పుడు స్క్రిప్ట్ ను అభివృద్ధి చేస్తున్నాను. సీక్వెల్ పేరు ఆదిత్య 999 మాక్స్. ఇదే మోక్షజ్ఞ‌ తొలి చిత్రం అవుతుంది`` అని బాలయ్య పేర్కొన్నారు. ఆదిత్య‌ 999 మాక్స్ 2023లో మాత్రమే విడుదల కానుందని నందమూరి హీరో అన్నారు. అంటే మోక్షు సినిమా కోసం మ‌రో రెండేళ్లు వేచి చూడాల్సి ఉంటుంద‌న్న‌మాట‌.

ఈ ప్రాజెక్ట్ కి బాల‌కృష్ణ లేదా సింగీతం ఎవ‌రు ద‌ర్శ‌క‌త్వం వ‌హిస్తారు? అన్న‌దానిపై ఇంకా క్లారిటీ లేదు. ఇంకా ద‌ర్శ‌కుడిని ఎంపిక చేయ‌లేద‌ని బాల‌య్య అన‌డం ఆస‌క్తిక‌రం. ఆదిత్య 999 మాక్స్ అత్యంత భారీ బడ్జెట్ తో రూపొంద‌నుంది. 2022లో ప్రారంభం కానున్న ఈ చిత్రం 2023లో విడుద‌ల‌వుతుది. ఇందులో మోక్ష‌జ్ఞ‌ సూపర్ హీరో త‌ర‌హా పాత్రలో కనిపించ‌నున్నార‌ని గుస‌గుస‌లు వినిపిస్తున్నాయి. ఇందులో బాలకృష్ణ కూడా నటించనున్నారు.