నాగ్ వాళ్లతో కలిసి నటిస్తేనా..

వేరే హీరోలతో కలిసి నటించడానికి నాగార్జున ఎప్పుడూ మొహమాట పడింది లేదు. టాలీవుడ్లో మల్టీస్టారర్లు మళ్లీ ఊపందుకోవడానికి ముందే అధిపతి.. నిన్నే ప్రేమిస్తా లాంటి సినిమాల్లో వేరే హీరోలతో కలిసి తెరను పంచుకున్నాడు నాగ్. ఇప్పుడు మల్టీస్టారర్లు మళ్లీ కొంత మేర జోరందుకున్నాయి. ప్రస్తుత రచయితలు.. దర్శకులు మల్టీస్టారర్ కథలు బాగానే వండుతున్నారు. సీతమ్మ వాకిట్లో సిరిమల్లె చెట్టు.. గోపాల గోపాల లాంటి మల్టీస్టారర్లకు మంచి స్పందనే వచ్చింది. మీడియం రేంజిలో మరికొన్ని మల్టీస్టారర్లు రెడీ అవుతున్నాయి. నాగ్ కూడా కార్తితో కలిసి ‘ఊపిరి’ చేశాడు.

ఆయన ఇప్పుడు యువ హీరోలతో కలిసి నటించడానికి ఆసక్తి కనబరుస్తున్నాడు. ఆల్రెడీ చందూ మొండేటి దర్శకత్వంలో నిఖిల్ తో కలిసి స్క్రీన్ షేర్ చేసుకోవడానికి అంగీకరించాడు నాగ్. దీంతో పాటు ‘రాజుగారి గది-2’లోనూ నాగ్ ఒకరిద్దరు యంగ్ హీరోలతో కలిసి నటిస్తున్నాడు. ఐతే నాగ్ యంగ్ స్టార్ హీరోలతో నటిస్తే బాగుంటుందని అభిమానుల ఆకాంక్ష. మహేష్ బాబు.. జూనియర్ ఎన్టీఆర్.. రామ్ చరణ్.. అల్లు అర్జున్ లాంటి హీరోలతో ఆయన మల్టీస్టారర్లు చేస్తే వాటి రేంజే వేరుగా ఉంటుంది. ఆ హీరోలందరూ కూడా నాగ్ తో పని చేయడానికి ఆసక్తిగానే ఉంటారనడంలో సందేహం లేదు. నిజానికి ‘ఊపిరి’ సినిమాను.. నాగ్ ఎన్టీఆర్ తో కలిసి చేయాలనుకున్నాడు. కొన్ని కారణాల వల్ల కుదర్లేదు. భవిష్యత్తులో ఎన్టీఆర్ తోనే కాదు.. మిగతా యువ హీరోలతోనూ నాగ్ స్క్రీన్ షేర్ చేసుకునే అవకాశాల్ని కొట్టిపారేయలేం.

Like Us on Facebook : https://www.facebook.com/Tupakidotcom/