ఈయన చిరంజీవిలా కాదుగా

ఇటీవలే మెగాస్టార్‌ చిరంజీవి షష్టి పూర్తి వేడుకలు ఘనంగా చేసుకున్నారు. 60వ పుట్టినరోజు వేడుకల్ని అంగరంగ వైభవంగా నిర్వహించారు చరణ్‌. ఈ వేడుకలు బాలీవుడ్‌, కోలీవుడ్‌, టాలీవుడ్‌ నుంచి భారీగా సెలబ్రిటీలు తరలి వచ్చారు. ఆ వేడుకలు ముగిశాక .. ఇక దృష్టంతా ఇదే నెలలో జరుపుకోబోతున్న కింగ్‌ పుట్టినరోజు వేడుక లపైకి మళ్లింది.

అయితే అక్కినేని అభిమానులకు నిరాశే ఈసారి. ఈనెల 29న కింగ్‌ నాగార్జున పుట్టినరోజు వేడుకలు అన్నపూర్ణ ఏడెకరాల్లో ఘనంగా జరగనున్నాయి. అయితే ఈ వేడుకల్లో కింగ్‌ మాత్రం కనిపించరు. ఇప్పటికే భార్య అమల సహా నాగార్జున విదేశాలకు వెళ్లిపోయారు. ఓ బీచ్‌ రిసార్టులో పీస్‌ ఫుల్‌ గా సెలబ్రేషన్స్‌ చేసుకుంటారాయన. ఆగష్టు 29 కోసం మూడు సినిమాలు ఎదురు చూస్తున్నాయి. నాగార్జున నటించిన సోగ్గాడే చిన్ని నాయనా, నాగచైతన్య నటించిన సాహసం శ్వాసగా సాగిపో సినిమాల టీజర్‌లు పుట్టినరోజు వేడుకల్లో లాంచ్‌ చేయనున్నారు. అదే వేదికపై అఖిల్‌ హీరోగా వివి వినాయక్‌ దర్శకత్వంలో తెరకెక్కుతున్న మిసైల్‌ ట్రైలర్‌ ని ఆవిష్కరించనున్నారు.

నాగార్జున గత ఏడాది పుట్టినరోజు వేడుకలు చేసుకోలేదు. ఏఎన్నార్‌ మరణంతో అక్కినేని ఫ్యామిలీ విషాదంలోనే గడిపింది. అందుకే ఈసారి కాస్త ప్రశాంత వాతావరణంలో టైమ్‌ స్పెండ్‌ చేయాలనుకుని కింగ్‌ ఇలా ప్లాన్‌ చేశారని చెబుతున్నారు.