మోహన్ లాల్ షాకింగ్ డెసిషన్

మోహన్ లాల్ మలయాళంలో బిగ్గెస్ట్ సూపర్ స్టార్. పాతికేళ్లకు పైగా కెరీర్ లో అద్భుతమైన విజయాలందుకున్నారాయన. అడపాదడపా పొరుగున ఉన్న కోలీవుడ్ లోనూ తన అదృష్టాన్ని పరీక్షించుకున్నారు. ఇద్దరు సినిమాలో ఆయన పోషించిన పాత్రను ఎవ్వరూ మరిచిపోలేరు. ఈ మధ్య విజయ్ తో కలిసి ‘జిల్లా’ సినిమాతోనూ సందడి చేశారు. ఆ సినిమా తెలుగులోనూ బాగానే ఆడి.. మోహన్ లాల్ ను తెలుగు ప్రేక్షకులకు చేరువ చేసింది. ఐతే ఈ ఊపులో మోహన్ లాల్ ను ఓ డైరెక్ట్ తెలుగు సినిమాలో నటింపజేయడానికి ప్రయత్నాలు మొదలయ్యాయి. ఐతే మోహన్ లాల్ తెలుగులోకి వస్తే ఏదో పెద్ద బ్యానర్ లో, పెద్ద హీరో సినిమాతో వస్తారనుకుంటే.. ఓ చిన్న సినిమాలో కీలక పాత్ర చేయడానికి ఒప్పుకుని అందరికీ షాకిచ్చారాయన.

సూరజ్, కవిత అనే కొత్త హీరో హీరోయిన్లతో సురేష్ వంశీ అనే కొత్త దర్శకుడు రూపొందించబోయే ఓ చిన్న సినిమాలో మోహన్ లాల్ కీలక పాత్ర పోషించబోతున్నాడట. విశ్వనాథ్ అనే కొత్త నిర్మాత తెరకెక్కించే ఈ సినిమా ఆగస్టు చివరి వారంలో మొదలుకానుంది. మోహన్ లాల్ తమ సినిమాలో నటిస్తున్న సంగతి తెలియజేస్తూ ఆ చిత్ర యూనిట్ ప్రెస్ నోట్ విడుదల చేసింది. ఐతే మోహన్ లాల్ ఇలాంటి పేరులేని దర్శకుడు, నిర్మాతల సినిమాలో నటించడమేంటని ఎవరికీ అర్థం కావడం లేదు. అందుకే ఈ వార్త నిజమా కాదా అని కూడా సందేహాలు వచ్చేస్తున్నాయి. ఒకవేళ మోహన్ లాల్ ఈ సినిమాలో నటిస్తే అదే ఆయనకు తొలి తెలుగు సినిమా కాదు. రెండు దశాబ్దాల కిందట బాలయ్య కథానాయకుడిగా మలయాళ దర్శకుడు ప్రియదర్శన్ రూపొందించిన ‘గాండీవం’ సినిమాలో ఆయన ఓ పాటలో తళుక్కుమన్నారు.