మంచు విష్ణు సినిమాలో ఈ మార్పులేంటి?

మంచు విష్ణు గత ఏడాది ‘సరదా’ అనే సినిమా మొదలుపెట్టిన సంగతి గుర్తుండే ఉంటుంది. ‘అడ్డా’ ఫేమ్ కార్తీక్ రెడ్డి దర్శకత్వంలో ఈ సినిమా మొదలైంది. దీని ఫస్ట్ లుక్ పోస్టర్లో చొక్కా విప్పి సిక్స్ ప్యాక్ లుక్ లో కనిపించాడు విష్ణు. చాన్నాళ్ల పాటు విష్ణు ట్విట్టర్ ప్రొఫైల్ పిక్ గా కూడా ఇదే ఉండేది. ఐతే గత కొన్ని నెలల నుంచి ఈ సినిమాకు సంబంధించి అప్ డేట్స్ ఏమీ లేవు. ఆర్నెల్ల కిందటే విడుదలవుతుందనుకున్న ఈ సినిమా అడ్రస్ లేకుండా పోయింది.

ఇప్పుడు ఈ సినిమా గురించి కొత్త వార్తలు వస్తున్నాయి. త్వరలోనే ఈ సినిమా మొదలవుతుందంటూ ఓ అప్ డేట్ వచ్చింది చిత్ర వర్గాల నుంచి. మలయాళ భామ మియా జార్జ్ ఇందులో కథానాయిక అంటున్నారు. వాస్తవానికి ఇంతకుముందు ‘సరదా’ సినిమాలో అంజలి.. సోనారికా బడోరియా హీరోయిన్లుగా ఎంపికయ్యారు.

పూర్తయిపోయిందనుకున్న సినిమా.. ఇప్పుడు మొదలవుతుందనడమేంటో అర్థం కావడం లేదు. పైగా హీరోయిన్ గా కొత్త పేరు వినిపిస్తోంది. బహుశా ఇంతకుముందు మొదలైన సినిమాను మధ్యలో పక్కనబెట్టి.. కొత్త కథతో కొత్త హీరోయిన్ తో వేరే సినిమా చేస్తున్నారేమో. మరోవైపు ‘సరదా’ సెట్స్ మీద ఉండగానే మంచు విష్ణు ‘లక్కున్నోడు’ అనే సినిమా మొదలుపెట్టి పూర్తి చేసేశాడు. ‘గీతాంజలి’ ఫేమ్ రాజ్ కిరణ్ దర్శకత్వం వహించిన ఈ చిత్రం ఫిబ్రవరి 3న ప్రేక్షకుల ముందుకొస్తుంది.

Like Us on Facebook : https://www.facebook.com/Tupakidotcom/