49 రోజుల తర్వాత రిలీజవుతున్న సినిమా అదే

ఎట్టకేలకు కోలీవుడ్లో సమ్మెకు తెరపడింది. అక్కడ మళ్లీ థియేటర్లు తెరుచుకుంటున్నాయి. కొత్త సినిమాలు రిలీజవుతున్నాయి. సమ్మెకు తెరపడిన రెండు రోజుల వ్యవధిలోనే కొత్త సినిమా థియేటర్లలోకి వచ్చేస్తుండటం విశేషం. 49 రోజుల విరామం తర్వాత అక్కడ రిలీజవ్వబోతున్న తొలి సినిమా ‘మెర్క్యురీ’. ఈ చిత్రం తమిళనాడు మినహా అన్ని ప్రాంతాల్లోనూ గత వారమే విడుదలైంది. తెలుగు రాష్ట్రాల్లో కూడా ఈ చిత్రం విడుదలైంది. సమ్మె కారణంగా తమిళనాడు వరకు రిలీజ్ ఆపారు. ఇది మూకీ సినిమా కావడం.. ఏ భాషకైనా ఒకటే వెర్షన్ కావడంతో తమిళంలో రిలీజ్ కోసం ప్రత్యేకంగా సన్నాహాలు చేయాల్సిన అవసరం లేకపోయింది.

చాన్నాళ్ల తర్వాత థియేటర్లు తెరుచుకుంటుండటంతో ఏ సినిమా అయినా ప్రేక్షకులు థియేటర్లకు పరుగులు పెట్టే అవకాశముంది. కాబట్టి ప్రమోషన్ గురించి కంగారు పడాల్సిన అవసరం కూడా లేదు. ‘పిజ్జా’ ఫేమ్ కార్తీక్ సుబ్బరాజ్ రూపొందించిన ఈ చిత్రంలో ప్రభుదేవా కీలక పాత్రలో నటించాడు. ఈ చిత్రంతో పాటు మరో రెండు చిన్న సినిమాలు విడుదల చేసుకోవడానికి కూడా తమిళ నిర్మాతల మండలి ఆఫర్ ఇచ్చింది. కానీ వాళ్లు ఏ నిర్ణయం చెప్పలేదు. ఇక గత నెలన్నరగా విడుదలకు నోచుకోకుండా ఆగిపోయిన సినిమాల్ని వచ్చే రెండు నెలల్లో క్లియర్ చేయడానికి తమిళ నిర్మాతల మండలి సంప్రదింపులు జరుపుతోంది. ఏప్రిల్ 27న రిలీజ్ కావాల్సిన ‘కాలా’.. మేలో విడుదల చేయాల్సి ఉన్న ‘విశ్వరూపం-2’ సినిమాల విషయంలో తాము చేసేదేమి లేదని.. వాళ్ల సౌలభ్యాన్ని బట్టి రిలీజ్ డేట్ ఖరారు చేసుకోవచ్చని నిర్మాతల మండలి అధ్యక్షుడు విశాల్ అన్నాడు.