మణిరత్నంకు కూడా తప్పలేదుగా

దిగ్గజ దర్శకుడు మణిరత్నం పేరే ఒక బ్రాండ్. ఆయన పేరు ఉంటే చాలు.. థియేటర్లకు వచ్చేసే ఆడియన్స్ బోలెడు మంది ఉంటారు. కొన్నేళ్ల పాటు ప్రేక్షకులను మెప్పించలేకపోయినా.. మళ్లీ ఇప్పుడు మణిసార్ ట్రాక్ లోకి వచ్చేసిన సంగతి తెలిసిందే. కాట్రు వెలియిదాయ్ అంటూ కార్తి హీరోగా ఓ సినిమా చేస్తున్నారు మణిరత్నం.

తెలుగులో ఈ చిత్రం చెలియా అనే టైటిల్ పై విడుదల కానుండగా.. ఇప్పుడీ మూవీకి సంబంధించిన వర్కింగ్ స్టిల్స్ రిలీజ్ చేశారు. కార్తికి సూచనలు చేస్తున్న మణిరత్నంను ఈ స్టిల్స్ లో చూడచ్చు. అయితే.. మణిరత్నం ఇలా తన సినిమాకి సంబంధించిన వర్కింగ్ స్టిల్స్ ను.. అది కూడా తనే ఉన్న ఫోటోలను బైటకు ఇవ్వడం అంటే మాత్రం విచిత్రమే. సహజంగా ఇలాంటి ప్రచారానికి.. ముఖ్యంగా సెల్ఫ్ ప్రమోషన్స్ కు దూరంగా ఉంటారు మణిరత్నం.

కానీ ఇప్పుడు మారుతున్న ట్రెండ్ ప్రకారం సినిమాకు హైప్ క్రియేట్ కావాలంటే ఇలాంటివన్నీ చేయకతప్పదనే విషయం ఆయనకు బాగానే అర్ధమైంది. సైలెంట్ గా సినిమా తీసేసి ప్రేక్షకుల తీర్పు పాటించేసే రోజులు కావు అనే పాయింట్ ను బాగానే పట్టుకున్న మణిరత్నం.. ఇప్పుడు తనకు తనే కూడా ప్రమోషన్స్ చేసుకుంటున్నారు. ఈ మూవీలో కార్తికి జోడీగా అదితి రావు హైదరి నటిస్తోంది.

Like Us on Facebook : https://www.facebook.com/Tupakidotcom/