మంచు విష్ణు మొత్తం మార్చేశాడుగా..

ఆ మధ్య దేనికైనా రెడీ - దూసుకెళ్తా - కరెంటు తీగ లాంటి సినిమాలతో మంచు ఫ్యామిలీ బండి బాగానే నడుస్తున్నట్లు కనిపించింది. కానీ ఈ మధ్య కథ మళ్లీ మొదటికి వచ్చింది. విష్ణు హీరోగా తెరకెక్కిన డైనమైట్ - మోహన్ బాబు-అల్లరి నరేష్ కాంబినేషన్లో వచ్చిన ‘మామ మంచు అల్లుడు కంచు’ సినిమాలు దారుణమైన ఫలితాన్నందుకున్నాయి. దీంతో మంచు వారి బేనర్లో రాబోయే తర్వాతి సినిమా విషయంలో చాలా జాగ్రత్తగా ఉండాల్సిందే. అందుకే తమ బేనర్లో దేనికైనా రెడీ - కరెంటు తీగ లాంటి రెండు హిట్లు ఇచ్చిన జి.నాగేశ్వరరెడ్డికే బాధ్యతలు అప్పగించాడు విష్ణు.

ఓ పంజాబీ సినిమా రీమేక్ రైట్స్ తీసుకున్న విష్ణు.. రాజ్ తరుణ్ కాంబినేషన్ లో ఆ సినిమాను రీమేక్ చేయబోతున్నట్లు ఆ మధ్య అనౌన్స్ చేసిన సంగతి తెలిసిందే. ఈ సినిమా ఎప్పుడు మొదలైందో తెలియదు కానీ.. చడీచప్పుడు లేకుండా సినిమాను పూర్తి చేసేస్తున్నారట. ఇంకో నెల రోజుల్లో సినిమా కూడా పూర్తయిపోతుందట. ఏప్రిల్ 14న రిలీజ్ అని కూడా అనౌన్స్ చేసేశారు. ‘డైనమైట్’ సినిమా కోసం చిత్రమైన అవతారంలో కనిపించిన విష్ణు.. ఆ లుక్ నుంచి బయటికి వచ్చేది తన కొత్త సినిమా కోసం డిఫరెంట్ లుక్ లోకి మారిపోయాడు. రాజ్ తరుణ్ - అతడు కలిసి ఉన్న పోస్టర్లు కొన్ని నెట్లో వదిలారు. విష్ణు లుక్ బాగా అనిపిస్తోంది. రాజ్ తరుణ్ కూడా బాగానే ఉన్నాడు. ఇందులో విష్ణు సరసన సోనారికా బడోరియా నటిస్తుండగా.. ‘కుమారి 21 ఎఫ్’ భామ హెబ్బా పటేల్ మరోసారి రాజ్ పక్కన కనిపించబోతోంది.