మహేష్ పాటలు మే నెలకి వాయిదా!!

సమ్మర్ సీజన్ కి షెడ్యూల్ అయిన భారీ సినిమాల్లో పవర్ స్టార్ పవన్ కళ్యాణ్ మూవీ సర్దార్ గబ్బర్ సింగ్ వచ్చేసింది. మరో పది రోజుల్లో స్టైలిష్ స్టార్ అల్లు అర్జున్ మూవీ సరైనోడు కూడా థియేటర్లలోకి వచ్చేస్తోంది. ఇక ఈ సమ్మర్ లో అలరించనున్న మరో హీరో సూపర్ స్టార్ మహేష్ బాబు.

బ్రహ్మోత్సవం అంటూ మహేష్ బాబు సమ్మర్ లోనే పండగ చేసేయనున్నాడు. మే నెలలో విడుదలకు సిద్ధమవుతోందని యూనిట్ వర్గాలు అంటున్నాయి. అయితే.. ఈ మూవీ కోసం తిరుపతిలో భారీ ఎత్తున తలపెట్టిన ఆడియో కార్యక్రమం వాయిదా పడిందని తెలుస్తోంది. నిజానికి ఈ నెల 24న తిరుపతిలో భారీ బహిరంగ సభ ఏర్పాటు చేసి, ఆడియో విడుదల చేయాలని అనకున్నారు. కొన్ని సాంకేతిక సమస్యలు, రవాణా ఇబ్బందుల కారణంగా.. ఇప్పుడీ మూవీ ఆడియో విడుదల కార్యక్రమాన్ని మే1కి వాయిదా వేసినట్లు తెలుస్తోంది.

అయితే వేదిక విషయంలో మాత్రం తిరుపతిని మార్చలేదు. అక్కడే బ్రహ్మోత్సవం ఆడియోఫంక్షన్ జరగనుంది. శ్రీకాంత్ అడ్డాల దర్శకత్వంలో మహేష్ నటిస్తున్న రెండో మూవీ ఇది. సీతమ్మ వాకిట్లో సక్సెస్ తర్వాత మళ్లీ ఈ కాంబినేషన్ లో వస్తున్న చిత్రం కావడంతో.. అంచనాలు ఎక్కువగా ఉన్నాయి. కాజల్ - సమంత - ప్రణీతలు హీరోయిన్లుగా నటిస్తున్న బ్రహ్మోత్సవం.. మే నెల చివరి వారంలో రిలీజ్ అయ్యే అవకాశాలు ఎక్కువగా ఉన్నాయి.