ముఖ్య‌మంత్రిగా మ‌హేష్‌ బాబు?

మాస్ క‌థానాయ‌కులు తెర‌పై పొలిటిషియ‌న్లుగా క‌నిపించిన‌ప్పుడు ఫ్యాన్స్‌లో ఆనందం క‌ట్ట‌లు తెంచుకుంటుంది. సహ‌జంగానే పాలిటిక్స్ అనేస‌రికి మాస్ జ‌నాలు ప్ర‌త్యేకమైన ఆస‌క్తి చూపుతుంటారు. త‌మ క‌థానాయ‌కుడు నిజంగానే ఆయా ప‌ద‌వుల్ని అలంక‌రించిన‌ట్టుగా ఊహిస్తూ థియేట‌ర్ల‌లో సంబ‌రాలు చేసుకొంటుంటారు. మ‌హేష్‌ బాబునే తీసుకోండి. `దూకుడు`లో ఖ‌ద్దరు దుస్తులేసి యంగ్ ఎమ్మెల్యే పాత్ర‌లో క‌నిపించిన‌ప్పుడు ఆయ‌న ఫ్యాన్స్ చేసిన హంగామా అంతా ఇంతా కాదు. ఇప్పుడు అదే గెట‌ప్‌ లో మ‌హేష్‌ బాబుని సీఎం పీఠంపై కూర్చున్నట్టు ఊహించుకోండి. ఆలోచిస్తేనే అదిరిపోవ‌డం లేదూ! ఇక అభిమానులైతే ఆ పాత్ర‌లో మ‌హేష్‌ ని ఎప్పుడెప్పుడు చూద్దామా అనే ఆత్రుత‌లో ఉంటారు. ఆ ఆత్రుతని ఏమాత్రం త‌గ్గించుకోవ‌ద్ద‌ని వాళ్ల‌కి చెప్పండి. ఎందుకంటే మ‌హేష్‌ బాబు త్వ‌ర‌లోనే తెర‌పై సీఎంగా క‌నిపించ‌బోతున్నాడు.

కొర‌టాల శివ ద‌ర్శ‌క‌త్వం వ‌హించ‌నున్న కొత్త చిత్రంలో మ‌హేష్ క‌థానాయ‌కుడిగా న‌టించ‌నున్న విష‌యం తెలిసిందే. ఆ సినిమాలోనే మ‌హేష్ సీఎంగా క‌నిపించ‌బోతున్నాడ‌ట‌. అనుకోకుండానే ఆయ‌న్ని సీఎం ప‌ద‌వి వ‌రిస్తుంద‌ట‌. అయితే ఆ ప‌ద‌విలో ఉన్న‌ప్ప‌టికీ ప్ర‌జ‌ల‌కి ఇచ్చిన హామీల్ని నెర‌వేర్చే వాతావ‌ర‌ణం ఉండ‌ద‌ట‌. దాంతో మ‌హేష్ త‌న‌కి తానే సంఘ‌ర్ష‌ణ‌కి గుర‌వుతుంటాడ‌ట‌. ఆ స‌న్నివేశాలు సినిమాకి హైలెట్ కానున్నాయ‌ని స‌మాచారం. జ‌న‌తా గ్యారేజ్‌ లో గ‌వ‌ర్న‌మెంట్ ఆఫీస్ ఎపిసోడ్‌ లాగానే మ‌హేష్ సీఎం పాత్ర ఎపిసోడ్ ఉంటుంద‌ని స‌మాచారం. ఈ సినిమాలో మ‌హేష్ స‌ర‌స‌న కీర్తి సురేష్ న‌టించబోతోంద‌ని స‌మాచారం.

Like Us on Facebook : https://www.facebook.com/Tupakidotcom/