వాటి పుణ్యం.. దీని పంట పండింది

ఓవైపు ‘కాటమరాయుడు’.. ‘దువ్వాడ జగన్నాథం’ లాంటి భారీ సినిమాలు ఓవర్సీస్‌ లో బయ్యర్లను నిలువునా ముంచేస్తే.. మరోవైపు చిన్న సినిమాలు అనూహ్యమైన వసూళ్లతో అదరగొట్టేశాయి. గత నెలలో వచ్చిన ‘ఫిదా’ సినిమా అమెరికాలో ఎవ్వరూ ఊహించని విధంగా 2 మిలియన్ డాలర్లు దాటేసి ఆశ్చర్యపరిచింది. రెండు వారాల కిందట వచ్చిన చిన్న సినిమా ‘ఆనందో బ్రహ్మ’ హాఫ్ మిలియన్ మార్కు దాటడమూ ఆశ్చర్యమే. ఇప్పుడు ‘అర్జున్ రెడ్డి’ రూపంలో మరో చిన్న సినిమా అక్కడ ప్రకంపనలు రేపుతోంది. ఇప్పటికే ఆ సినిమా అక్కడ మిలియన్ డాలర్ల మార్కును దాటేసింది. ఈ నేపథ్యంలో భారీ సినిమాలతో జూదం కన్నా.. చిన్న సినిమాల మీద పెట్టుబడి పెట్టడం మంచిదన్న నిర్ణయానికి వచ్చేస్తున్నారు యుఎస్ బయ్యర్లు.

ఓవైపు మహేష్ బాబు.. పవన్ కళ్యాణ్.. ఎన్టీఆర్ లాంటి స్టార్ల సినిమాల ఓవర్సీస్ బిజినెస్ ఓ పట్టాన తెగట్లేదు. నిర్మాతలు ఆశించిన రేటు ఇవ్వడానికి బయ్యర్లు తటపటాయించారు. కానీ చిన్న సినిమాలకు మాత్రం వాటి స్థాయికి మించి బిజినెస్ జరుగుతోంది. పైన చెప్పుకున్న మూడు సినిమాల ఊపు చూసి.. మారుతి-శర్వానంద్ కాంబినేషన్లో తెరకెక్కిన కొత్త సినిమా ‘మహానుభావుడు’కి అదిరిపోయే రేటు ఇచ్చింది ఓ సంస్థ. ఈ చిత్ర యుఎస్ డిస్ట్రిబ్యూషన్ హక్కుల్ని ఓ సంస్థ రూ.3.3 కోట్లకు కొనడం విశేషం. ఆ సినిమా స్థాయికి ఇది చాలా పెద్ద రేటే. అంటే ఈ చిత్రం మిలియన్ డాలర్లు కొడితేనే సేఫ్ జోన్లోకి వస్తుందన్నమాట. దీన్ని బట్టి ఈ సినిమాపై ఎంత భరోసా ఉందో అర్థం చేసుకోవచ్చు. మారుతి ఇంతకుముందు ఇదే తరహాలో తీసిన ‘భలే భలే మగాడివోయ్’కి యుఎస్ తెలుగు ఆడియన్స్ బ్రహ్మరథం పట్టారు. శర్వా గత కొన్నేళ్లలో నటించిన సినిమాలు చాలావరకు అక్కడ బాగా ఆడాయి. ఈ నేపథ్యంలో ఫ్యాన్సీ రేటు ఇచ్చినట్లున్నారు.