ప‌చ్చ‌ని కాపురంలో నిప్పులు! ఆ జంట‌కు విడాకులేనంటూ కేఆర్కే కామెంట్లు..!

వివాదాస్ప‌ద బాలీవుడ్ క్రిటిక్ కేఆర్కే నాలుక‌కు న‌రం తెగింది. అత‌డు ఇప్ప‌టికే త‌న అసంబ‌ద్ధ‌ వాద‌న‌లు వినిపిస్తూ తీవ్ర‌మైన‌ క్రిటిసిజంతో నేరారోప‌ణ‌లు ఎదుర్కొంటున్నాడు. ఇటీవ‌లే బాలీవుడ్ కండ‌ల హీరో స‌ల్మాన్ ఖాన్ అత‌డిపై ఎంత సీరియ‌స్ యాక్ష‌న్ తీసుకున్నారో తెలిసిందే. రాధే కు వ్య‌తిరేక స‌మీక్ష రాయ‌డ‌మే గాక బీయింగ్ స‌ల్మాన్ ఆర్థిక లావాదేవీల‌పై ఊహించ‌ని కామెంట్లు చేసారు కేఆర్కే. దీంతో చిర్రెత్తుకొచ్చిన స‌ల్మాన్ ఖాన్ అత‌డిపై పోలీస్ కేసు పెట్టిన సంగ‌తి తెలిసిందే. ప్ర‌స్తుతం ఈ వివాదం కోర్టుల ప‌రిధిలో న‌లుగుతోంది.

తాజాగా కేఆర్కే బాలీవుడ్ ఆద‌ర్శ జంట‌ల‌ను టార్గెట్ చేస్తూ చేసిన కామెంట్లు అంత‌ర్జాలంలో హీటెక్కిస్తున్నాయి. ఇంత‌కీ అత‌డు ఎవ‌రిని టార్గెట్ చేశాడు.. ఏమ‌ని కామెంట్ చేశాడు? అన్న‌ది వివ‌రాల్లోకి వెళితే..
బాలీవుడ్ ఆద‌ర్శ జంట‌గా ఓ వెలుగు వెలుగుతున్న సైఫ్-కరీనా జోడీపైనా.. గ్లోబ‌ల్ స్టార్ ప్రియాంక-నిక్ జోడీపైనా అత‌డు విప‌రీత వ్యాఖ్య‌లు చేశాడు. పీసీ- నిక్ కాపురం స‌జావుగా సాగదు!! అంటూ అత‌డు చేసిన కామెంట్లు సంచ‌ల‌నంగా మారాయి. ప్ర‌స్తుతం కేఆర్కే ట్వీట్ల‌పై ట్రోలింగ్ సాగుతోంది.

నటుడు కమ్ ఫిల్మ్ విమర్శకుడు కమల్ ఆర్. ఖాన్ ప్రపంచంలో సాధ్యమయ్యే ప్రతిదాని గురించి ఒక అభిప్రాయాన్ని కలిగి ఉన్నారనేది కాదనలేని వాస్తవం. బాలీవుడ్ లో చాలామందిపై అతడి దురుసైన వ్యాఖ్య‌లు వివాదాల‌కు కార‌ణ‌మ‌య్యాయి. తన మాటలతోనే అత‌డు తరచుగా సోషల్ మీడియాలో నెటిజనుల నుంచి తీవ్ర వ్య‌తిరేక‌త‌ను ఎదుర్కొన్నాడు. ఈసారి కూడా ఇలాంటి వివాద‌మే. దిగ్గజ నటుడు దిలీప్ కుమార్ మరణం పట్ల ప్రపంచమంతా సంతాపం జరుపుకుంటున్న వేళ .. నీతు కపూర్ కుటుంబ సభ్యులపై అతడు ఊహించ‌ని కామెంట్ చేయ‌డంపై నెటిజ‌నుల్లో చ‌ర్చ సాగింది.

ఇంత‌లోనే మ‌రిన్ని కామెంట్ల‌తో అతడు వేడి పెంచాడు. ప్రియాంక చోప్రా - నిక్ జోనాస్ జంట ప‌దేళ్ల త‌ర్వాత విడాకులు తీసుకుంటారంటూ ఇప్పుడు జోశ్యం చెప్పి బిగ్ బాంబ్ పేల్చాడు. అతని ట్వీట్ వైరల్ అయిన కొద్ది నిమిషాల్లోనే నెటిజనులు అత‌డిని చీల్చి చెండాడారు. ప్రియాంక - నిక్ బలమైన ప్రేమ‌బంధంతో ముడిప‌డి ఉన్నార‌ని ప్రపంచం నలుమూలల నుంచి ప్రజలు మ‌ద్ధ‌తు ప‌లికారు. కేఆర్కేని విప‌రీతంగా ట్రోల్ చేశారు.

అంతకుముందు మరొక ట్వీట్ లో సైఫ్ - కరీనా వారి కుమారులకు పేర్లను తప్పుగా ఎంచుకున్నందున వారు విజయవంతం కాలేర‌ని KRK పేర్కొన్నారు. నిమిషాల్లో ట్విట్టర్ వినియోగదారులు సైఫీనా జంటకు వారి పిల్లలకు మద్దతుగా నిలిచారు.``తేరా నామ్ సాహి దియా థా తేరే ఘర్వాలోన్ నే? తు క్యున్ నెహిన్ బాన్ పయా ఆచా నటుడు .... `` అంటూ ఓ నెటిజ‌న్ వ్యాఖ్యానించారు.

ఇంతకుముందు కెఆర్కెపై స‌ల్మాన్ పరువునష్టం కేసు పెట్టిన సంగ‌తి తెలిసిందే. సల్మాన్ `రాధే: యువర్ మోస్ట్ వాంటెడ్ భాయ్` ను సమీక్షించిన KRK తన సినిమా సమీక్షలో సల్మాన్ ఖాన్ గురించి ప్రస్తావించేటప్పుడు అసభ్యకరమైన భాషను ఉపయోగించార‌ని తెలిసింది. ప్ర‌స్తుతం దీనిపై చట్టపరమైన దావా న‌డుస్తోంది.

కమల్ ఆర్ ఖాన్ పై సల్మాన్ పరువు నష్టం ఫిర్యాదు చేశారు. పరువు నష్టం దావాపై స్పందిస్తూ.. కమల్ ఆర్ ఖాన్ ట్వీట్ చేస్తూ ``నేను చాలా సార్లు చెప్పాను...ఏ నిర్మాత అయినా.. లేదా న‌టుడు అయినా త‌మ సినిమాను సమీక్షించవద్దని అడిగితే నేను ఎప్పుడూ సమీక్షించను. సల్మాన్ ఖాన్ # రాధే సమీక్ష కోసం నాపై పరువు నష్టం కేసు పెట్టారు అంటే నా సమీక్ష వల్ల అతను ఎక్కువగా ప్రభావితమవుతున్నాడు. అందువల్ల నేను అతని సినిమాలను సమీక్షించను`` అని వ్యాఖ్యానించారు.

అయితే ఈ చిత్రంపై తన సమీక్షకు ఈ దావా అని KRK పేర్కొన్నప్పటికీ సల్మాన్ న్యాయ బృందం పరువు నష్టం కేసు పూర్తిగా వ్యక్తిగత దాడులకు సంబంధించినదని ప్రకటించింది. ముఖ్యంగా స‌ల్మాన్ కి చెందిన ఎన్జీవో `బీయింగ్ హ్యూమన్` గురించి కేఆర్కే చేసిన వ్యాఖ్యలపై ఈ దావా వేసారు. మిస్టర్ సల్మాన్ ఖాన్ అవినీతిపరుడు.. అతను అతని బ్రాండ్ బీయింగ్ హ్యూమన్ మోసం.. అంతా తారుమారు .. డబ్బు కోసం ఇదంతా! అంటూ వ్యాఖ్యానించ‌డంతో దానిపై స‌ల్మాన్ దావా వేశారు. మ‌నీ లాండరింగ్ లావాదేవీలకు స‌ల్మాన్ తో పాటు సల్మాన్ ఖాన్ ఫిల్మ్స్ డకోయిట్స్ అని వ్యాఖ్యానించడం ఈ కోపానికి కార‌ణ‌మ‌ని తెలిసింది.