రామ్ సినిమా.. రియల్ స్టోరీ

ఎనర్జిటిక్ స్టార్ రామ్ కెరీర్ మూణ్నాలుగేళ్లుగా ఏమంత బాగా లేదు. ‘కందిరీగ’ తర్వాత అతడి సినిమాలేవీ సరిగా ఆడలేదు. సినిమాలు ఫ్లాపవడం కంటే కూడా పరమ రొటీన్ సినిమాలు చేస్తున్నాడన్న విమర్శలు అతడికి బాగా చెడ్డ పేరు కూడా తెచ్చాయి. ఈ నేపథ్యంలో ‘నేను శైలజ’ మీద ఎన్నో ఆశలతో ఉన్నాడు రామ్. రొటీన్ సినిమాలు చేస్తున్నానన్న విమర్శలు చెరిపేయడమే కాక.. తన కెరీర్ కు అత్యావశ్యకమైన విజయాన్ని కూడా అందిస్తుందని ఈ సినిమా మీద ఎన్నో అంచనాలతో ఉన్నాడు రామ్. టీజర్ - ట్రైలర్ చూస్తే రామ్ ఆశలు నెరవేరేలాగే అనిపిస్తున్నాయి.

స్రవంతి మూవీస్ సంస్థలో రచయితగా పని చేసి ఈ చిత్రంతో దర్శకుడిగా పరిచయమవుతున్న కిషోర్ తిరుమల కూడా ఔట్ పుట్ మీద చాలా కాన్ఫిడెంట్ గా ఉన్నాడు. ఇదొక నిజ జీవిత కథ అని.. సినిమా విడుదలయ్యాక ఈ కథ ఎవరిదన్నది వెల్లడిస్తానని కిషోర్ చెప్పాడు. రామ్ కు ఈ సినిమా ఎంత కీలకమో అర్థం చేసుకుని చాలా టైం తీసుకుని ఈ సినిమా స్క్రిప్టు రాశానన్నాడు. ‘‘నేను శైలజ స్క్రిప్టు రాయడానికి ఏడాది పైనే టైం పట్టింది. ఏ విషయంలోనూ రాజీ పడకుండా.. కొత్తగా ఉండేలా స్క్రిప్టు తీర్చిదిద్దాను. స్రవంతి మూవీస్ బేనర్లో వచ్చిన నువ్వే నువ్వే తరహా ఫీల్ ఈ సినిమాలో ఉంటుంది. నా కథకు స్ఫూర్తి ఎవరన్నది సినిమా విడుదలయ్యాక చెబుతాను’’ అని కిషోర్ చెప్పాడు.