అమీర్-అమితాబ్ మెగా ప్రాజెక్టులో ఆమె..

‘బాహుబలి’ని కొట్టే సినిమా తీయాలని మిగతా ఇండస్ట్రీల వాళ్లు గట్టి పట్టుదలతోనే ఉన్నారు. కోలీవుడ్లో ‘2.0’తో పాటు ‘సంఘమిత్ర’ లాంటి భారీ ప్రాజెక్టులు లైన్లో ఉన్నాయి. మరోవైపు మలయాళం వాళ్లు వెయ్యి కోట్ల మహాభారతం ప్రాజెక్టుకు సన్నాహాలు చేస్తున్నారు. ఇంకోవైపు బాలీవుడ్లోనూ ఓ భారీ సినిమా తెరమీదికి రాబోతోంది. అదే.. థగ్స్ ఆఫ్ హిందోస్థాన్. మిస్టర్ పర్ఫెక్షనిస్ట్ అమీర్ ఖాన్.. ఆల్ ఇండియా మెగాస్టార్ అమితాబ్ బచ్చన్ తొలిసారి కలిసి నటించబోతున్న సినిమా ఇది. ఈ మెగా కాంబినేషన్లో సినిమా అనగానే అంచనాలు పెరిగిపోయాయి. ‘ధూమ్-1’.. ‘ధూమ్-2’ సినిమాలకు రచయితగా పని చేసి.. ‘ధూమ్-3’తో దర్శకుడిగా మారిన విజయ్ కృష్ణ ఆచార్య దర్శకత్వం వహించబోయే సినిమా ఇది.

ఈ క్రేజీ ప్రాజెక్టులోకి ఇంకో పెద్ద స్టార్ ఎంట్రీ ఇచ్చింది. ఆమె ఎవరో కాదు.. కత్రినా కైఫ్. ‘థగ్స్ ఆఫ్ హిందోస్థాన్’లో కత్రినానే కథానాయిక అని అమీర్ ఖాన్ స్వయంగా ప్రకటించాడు. ‘దంగల్’లో అమీర్ కూతురిగా నటించిన సనా షేక్ కూడా ఇందులో ఓ కీలక పాత్ర పోషించనుంది. అమీర్-కత్రినా కలిసి విజయ్ కృష్ణ దర్శకత్వంలోనే తెరకెక్కిన ‘ధూమ్-3’లో జంటగా నటించాడు. ఆ హిట్ కాంబోనే రిపీట్ చేస్తున్నాడిప్పుడు. ధూమ్-3 టైంతో పోలిస్తే.. ఆ తర్వాత కత్రినా డౌన్ అయింది. ఇప్పుడు ఆమె చేతిలో పెద్దగా అవకాశాలు లేవు. ఇలాంటి టైంలో ‘థగ్స్ ఆఫ్ హిందోస్థాన్’ లాంటి మెగా ప్రాజెక్టులో అవకాశం దక్కడం గొప్ప విషయమే. యశ్ రాజ్ ఫిలిమ్స్ అత్యంత ప్రతిష్టాత్మకంగా ఈ చిత్రాన్ని నిర్మిస్తోంది. 2018 చివర్లో ఈ సినిమా ప్రేక్షకుల ముందుకొస్తుంది.

Like Us on Facebook : https://www.facebook.com/Tupakidotcom/