ఇందిరా గాంధీ పాత్రలో కంగనా..!

లేడీ ఓరియెంటెడ్‌ సినిమాలతో సత్తా చాటుతున్న బాలీవుడ్‌ క్వీన్‌ కంగనా రనౌత్‌.. ఇప్పుడు దేశ తొలి మహిళా ప్రధానమంత్రి, ఉక్కు మహిళ (ఐరన్‌ లేడీ)గా గుర్తింపు పొందిన ఇందిరాగాంధీ పాత్రలో నటించడానికి రెడీ అయింది. పొలిటికల్‌ డ్రామాగా తెరకెక్కనున్న ఈ చిత్రం బయోపిక్‌ కాదని.. ఇంకా టైటిల్‌ నిర్ణయించని ఈ మూవీలో పలు దిగ్గజ నటులు నటిస్తారని కంగనా వెల్లడించారు. ప్రస్తుతం ఈ ప్రాజెక్టుపై పనిచేస్తున్నామని, స్క్రిప్ట్‌ పనులు తుదిదశకు చేరుకున్నాయని సోషల్ మీడియా వేదికగా వెల్లడించింది. దేశంలో నెలకొన్న రాజకీయాలపై ఈ తరానికి ఈ పొలిటికల్‌ మూవీ ఓ అవగాహన కల్పిస్తుందని అన్నారు.

తన స్నేహితుడు సాయి కబీర్‌ తో కలిసి రాజకీయ నేపథ్యం ఉన్న కథలో నటిస్తున్నందుకు ఆనందంగా ఉందని కంగనా పేర్కొంది. మణికర్ణిక తీసిన బృందమే ఈ సినిమాకు పని చేస్తున్నట్లు తెలిపింది.ఈ క్రమంలోనే కంగనాపై చేసిన ఫొటోషూట్‌ వివరాలను కూడా వెల్లడించింది. ఇది నా కెరీర్ ప్రారంభంలో నేను చేసిన ఐకానిక్ ఉమెన్ ఫోటోషూట్.. తెరపై ఐకానిక్ లీడర్‌ గా నటించబోతున్నానని నాకు తెలుసు అని కంగనా తెలిపింది. ఈ ఫోటోలలో కంగనా ఇందిరాగాంధీ లుక్‌ లో మెరిసింది. ఇందిరా గాంధీ మాదిరిగా హెయిర్‌ స్టైల్‌, వస్త్రధారణలో కనిపించింది. అయితే కాంగ్రెస్ పార్టీ అంటే పడని కంగనా రనౌత్.. ఇందిరాగాంధీ పాత్రలో నటించడం గమనార్హం.