కళ్యాణ్ రామ్ మరో 'రాంబాబా'...?

గెలుపోటములలో పడుతూ లేస్తూ కళ్యాణ్ రామ్ ఎప్పటికప్పుడు ఓ కొత్త తీరాన్ని వెతికుతూ నటుడిగా, నిర్మాతగా తన సినీ పయనాన్ని సాగిస్తున్నారు. గతేడాది పటాస్ విజయం సాధించినా తర్వాత వచ్చిన షేర్ ఆ ఉత్సాహాన్నంతా నీరు గార్చేసింది. అక్కడినుండి కథల ఎంపికలో జాగ్రత్త వహిస్తున్న కళ్యాణ్ రామ్ కి పూరి జగన్నాధ్ రూపంలో అదృష్టం హాగ్ ఇచ్చింది. హీరో పాత్రని పవర్ ఫుల్ గా చూపించడంలో పూరిని మించి మరొకరు లేరంటే అతిశయోక్తి కాదు. కథనంతా అతడి కోణంలో నడిపించి ఆ హీరోకి ఓ బ్రాండ్ ఇమేజ్ తీసుకొస్తారు.వీరిద్దరి కాంబినేషన్ లో రానున్న సినిమాలో కళ్యాణ్ రామ్ పాత్రనీ అదేవిధంగా తీర్చిదిద్దారట ఈ డాషింగ్ డైరెక్టర్.

ఎన్టీఆర్ ఆర్ట్స్ బ్యానర్ పై కళ్యాణ్ స్వీయ నిర్మాణంలో రూపొందనున్న ఈ సినిమాలో కళ్యాణ్ రామ్ పాత్రికేయుడు (జర్నలిస్ట్)గా కనపడనున్నాడట. కళ్యాణ్ రామ్ కి ఇదో కొత్త పాత్ర అనడంలో ఎలాంటి సందేహం లేదు. ఇక దర్శకుడు పూరి అయితే కెమెరామేన్ గంగతో రాంబాబు సినిమాలో పవన్ తో మైక్ పట్టించి ఎన్నో అంశాలను ప్రస్తావించి రాజకీయ, మీడియా రంగాలపై ఓ బాంబ్ ను విసిరారు. ఆర్థిక లావాదేవీల సంగతి పక్కనపెడితే ఆ సినిమాకి మంచి పేరొచ్చింది. ఇప్పుడు మళ్ళీ కళ్యాణ్ రామ్ చేతికి మైక్ ఇస్తున్నారంటే.. ఆ సబ్జెక్ట్ ఎంత పవర్ ఫుల్ గా ఉంటోందో ఊహించుకోవచ్చు. ఈ సినిమాతో కళ్యాణ్ రామ్ మరో రాంబాబుగా మెప్పిస్తాడా లేదా అన్నది చూడాలి.