అప్పుడు మగధీర.. ఇప్పుడు సర్దార్..

టాలీవుడ్ చందమామ కాజల్ కెరీర్ లో చాలానే సినిమాలు ఉన్నాయి. టాలీవుడ్ లో అందరు స్టార్లతో చేసిన హిస్టరీ కాజల్ అగర్వాల్ సొంతం. మరి తొమ్మిదేళ్ల కెరీర్ లో ఏ కేరక్టర్లు బెస్ట్ అంటే.. సాధారణంగా మిగిలిన హీరోయిన్లు ఈ క్వశ్చన్ కి ఆన్సర్ చేసేందుకు సందేహిస్తారు. కానీ కాజల్ మాత్రం ఏ మాత్రం తడబడకుండా ఆన్సర్ ఇచ్చేసింది.

తన కెరీర్ లో బెస్ట్ మూవీస్ అంటే.. ఒకటి మగధీర - రెండు సర్దార్ అని చెప్పేసింది కాజల్. ఈ రెండు సినిమాల్లోనూ కాజల్ పాత్ర యువరాణి కావడం విశేషం. రెండు భారీ బడ్జెట్ తో రూపొందినవే కాగా.. ఈ రెండు సినిమాలు మెగా హీరోలవే కావడం గమనించాలి. యువరాణిగా నటించిన పాత్రలు రెండూ తన కెరీర్ లోనే బెస్ట్ అంటోంది కాజల్. ఈ రోల్స్ ఆఫర్ చేసిన మెగా హీరోలకు బోలెడు థ్యాంక్స్ అని కూడా అంటోందీ చందమామ. మరికొన్ని గంటల్లో విడుదల కానున్న సర్దార్ గబ్బర్ సింగ్ పై కాజల్ చాలానే ఆశలు పెట్టుకుంది. తొలిసారిగా పవర్ స్టార్ పవన్ కళ్యాణ్ తో కలిసి నటిస్తుండడంతో.. రిజల్ట్ కోసం చాలా ఆతృతగా ఎదురుచూస్తోంది కాజల్.

సర్దార్ గబ్బర్ సింగ్ ను హిందీలో కూడా రిలీజ్ చేస్తుండడం.. అక్కడ తన రోల్ కు తనే డబ్బింగ్ చెప్పేసుకోవడంతో.. బాలీవుడ్ వెర్షన్ పై కూడా కాజల్ ఆశలు చాలానే ఉన్నాయి. అక్కడ ఇప్పటికే ఒకట్రెండు హిట్స్ కొట్టిన కాజల్.. సర్దార్ కూడా సక్సెస్ అయితే, తన రేంజ్ బాలీవుడ్ లో పెరిగిపోతుందని భావిస్తోంది కాజల్.