కబాలి రా? పైరసీ దగ్గర కాదురా

కబాలి.. రీసెంట్ టైమ్ లో ఇండియాలోనే అత్యధికంగా క్రేజ్ వచ్చిన మూవీ. కబాలి గురించి ఫుల్ పేజ్ ఆర్టికల్ వేయని పేపర్ లేదు.. స్పెషల్ ఎపిసోడ్స్ టెలికాస్ట్ చేయని ఛానల్ లేదు.. కుప్పలు తెప్పలుగా ఆర్టికల్స్ రాయని వెబ్ సైట్ లేదు. వీటన్నిటిలో పైరసీపై కబాలి చేసిన ఫైట్ కూడా ఉంది.

రజినీకాంత్ మూవీ కబాలి రిజల్ట్ ఎలా ఉందనే విషయం పక్కన పెడితే.. పైరసీని అరికట్టడంలో వీళ్లేదో సక్సెస్ అవుతారే అనిపించింది. విడుదలకు ముందే నెట్ లో కాపీ వస్తే.. విజయవంతంగా బ్లాక్ చేయగలిగారనే టాక్ ఉంది. దీనికి తోడు 225 సైట్లను బ్లాక్ చేయించడం కూడా కబాలి సక్సెస్ గా చెప్పారు. కానీ ఇవన్నీ రిలీజ్ వరకే. విడుదలయ్యాక సీన్ సితార్ అయిపోయింది. అలా మాణింగ్ షో పూర్తయిందో లేదో.. ఇలా నెట్ లో తమిళ్ వెర్షన్ దర్శనమిచ్చేసిందంటున్నారు. అది కూడా హెడ్ క్వాలిటీతో నెట్ లో దొరికేస్తోందని సమాచారం.

ఎన్ని సైట్లను బ్లాక్ చేయించినా.. మరింతగా పాకిపోతోంది. టోరెంట్ సైట్ల నుంచి కబాలి తమిళ్ వెర్షన్ ఇప్పటికే లక్షల్లో డౌన్ లోడ్స్ అయిపోయిందని అంటున్నారు. ఏమైనా కబాలిరా అంటూ రజినీకాంత్ విలన్లను బెదిరించగలిగాడేమో కానీ.. పైరసీపై ఫైట్లో మాత్రం కబాలికి ఓటమి తప్పలేదు.