వర్మ సినిమాలో చంద్రబాబు పాత్రకు అతనా?

ఎన్టీఆర్ మీద బయోపిక్ అనగానే అందులో కీలక పాత్రలు చేసే నటీనటులు ఎవరు అనే ఆసక్తి అందరిలోనూ నెలకొంది. ఎన్టీఆర్ మీద ఒకటికి రెండు సినిమాలు తెరకెక్కుతుండటంతో ఈ ఆసక్తి రెట్టింపైంది. బాలకృష్ణ చేయబోయే ‘ఎన్టీఆర్’ సినిమా విషయంలో నటీనటుల గురించి పెద్దగా ఊహాగానాలు లేవు కానీ.. వర్మ తీయబోయే ‘లక్ష్మీస్ ఎన్టీఆర్’ విషయంలో మొదట్నుంచి ఆసక్తికర రూమర్లు హల్ చల్ చేస్తున్నాయి. ఈ చిత్రంలో ఎన్టీఆర్ పాత్రకు ప్రకాష్ రాజ్.. లక్ష్మీపార్వతి పాత్రకు రోజా ఎంపికైనట్లుగా గుసగుసలు వినిపించాయి. ఐతే ఎన్టీఆర్ పాత్రకు ఓ కొత్త నటుడిని తీసుకుని ట్రైన్ చేస్తున్నట్లుగా వర్మ క్లారిటీ ఇచ్చాడు. లక్ష్మీపార్వతి పాత్ర విషయంలో మాత్రం ఏ స్పష్టతా లేదు.

మరోవైపు ‘లక్ష్మీస్ ఎన్టీఆర్’ సినిమాలో విలన్ కావచ్చని భావిస్తున్న నారా చంద్రబాబు నాయుడు పాత్రలో కనిపించే నటుడు జేడీ చక్రవర్తి అంటూ వార్తలు వినిపిస్తున్నాయి. ఎప్పుడూ గడ్డంతో ఉండే జేడీ చంద్రబాబు పాత్రకు బాగా సూటవుతాడని.. ఈ పాత్రకు తగ్గట్లుగా అతణ్ని మౌల్డ్ చేసుకోవడం ఈజీ అని వర్మ భావిస్తున్నాడట. ఈ పాత్ర చేయడానికి వేరే నటులు ముందుకు రావడం కష్టమే. ఐతే వర్మ లాగే సంచలనాలకు అలవాటు పడ్డ జేడీ.. తనకు లైఫ్ ఇచ్చిన వర్మ కోసం ఈ పాత్ర చేయడానికి ముందుకొచ్చాడట. త్వరలోనే ఈ విషయమై అధికారిక ప్రకటన రావొచ్చని భావిస్తున్నారు. ప్రస్తుతం వర్మ ‘లక్ష్మీస్ ఎన్టీఆర్’ కాస్టింగ్ సంగతి చూస్తూనే నాగార్జునతో చేయాల్సిన సినిమా వర్క్ కూడా కానిస్తున్నాడు. ‘లక్ష్మీస్ ఎన్టీఆర్’ వచ్చే ఏడాది ఫిబ్రవరిలో సెట్స్ మీదికి వెళ్తుంది.