నవీన్ బర్త్ డే పోస్టర్: 'జాతిరత్నాలు' రిలీజ్ ఎప్పుడు రా అయ్యా?

'ఏజెంట్ సాయి శ్రీనివాస ఆత్రేయ' సినిమాతో మంచి గుర్తింపు తెచ్చుకున్న యువ హీరో నవీన్ పోలిశెట్టి నటిస్తున్న లేటెస్ట్ మూవీ ''జాతిరత్నాలు''. స్వప్న సినిమాస్ బ్యానర్ లో 'మహానటి' చిత్రాన్ని రూపొందించిన డైరెక్టర్ నాగ్ అశ్విన్ ఈ కామెడీ ఎంటర్టైనర్ ని నిర్మించాడు. ఈ చిత్రానికి అనుదీప్ కేవీ దర్శకత్వం వహించారు. ఇందులో హాస్యనటులు రాహుల్ రామకృష్ణ - ప్రియదర్శి ఇతర ప్రధాన పాత్రలు పోషించారు. ఎప్పుడో షూటింగ్ పూర్తి చేసుకున్న 'జాతిరత్నాలు' సినిమా పోస్ట్ ప్రొడక్షన్ పనులు కూడా జరిగాయని సమాచారం. అయితే కరోనా మహమ్మారి కారణంగా ఈ సినిమా విడుదలపై మేకర్స్ క్లారిటీ ఇవ్వలేదు. ఈ నేపథ్యంలో తాజాగా విడుదల చేసిన కొత్త పోస్టర్ లో కూడా ఈ సినిమా రిలీజ్ ఎప్పుడు అంటూ ప్రశ్నిస్తున్నాడు మన జాతిరత్నం.

నేడు టాలెంటెడ్ హీరో నవీన్ పోలిశెట్టి పుట్టినరోజు కానుకగా 'జాతిరత్నాలు' టీమ్ అతనికి శుభాకాంక్షలు తెలుపుతూ ఓ పోస్టర్ విడుదల చేసింది. ఇందులో ఖైదీ నెం.879 డ్రెస్ ధరించిన నవీన్.. జైలులో కూర్చొని తీక్షణంగా ఆలోచిస్తూ కనిపిస్తున్నాడు. 'మా సినిమా రిలీజ్ ఎప్పుడు రా అయ్యా?' అని చెప్పడం ఇంట్రెస్టింగ్ గా అనిపిస్తోంది. మొత్తం మీద ఈ జాతిరత్నం 'నిప్పులే శ్వాసగా.. గుండెలో ఆశగా.. తరతరాల ఎదురు చూపులు' అంటూ పాడుకుంటూ సినిమా రిలీజ్ కోసం ఎదురుచూస్తున్నట్లు తెలుస్తోంది. చిత్ర యూనిట్ వారి మీద వాళ్లే సెటైర్ వేసుకుంటూ వైవిధ్యంగా ప్లాన్ చేసిన ఈ కొత్త పోస్టర్ విశేషంగా ఆకట్టుకుంది. ఈ చిత్రానికి రధన్ సంగీతం సమకూరుస్తుండగా.. సిద్దం మనోహర్ సినిమాటోగ్రాఫర్ గా వ్యవహరించారు. త్వరలోనే 'జాతిరత్నాలు' సినిమా విడుదలపై స్పష్టత వస్తుందేమో చూడాలి.