సల్మాన్ సినిమాలో నితిన్ హీరోయిన్

యంగ్ హీరో నితిన్ మూవీ 'గుండె జారి గల్లంతయ్యిందే' చిత్రంతో టాలీవుడ్ అరంగేట్రం చేసిన బ్యూటీ ఇషా తల్వార్. ఆ తర్వాత వరుసగా మలయాళ మూవీస్ లో చేసిన ఈ బ్యూటీ.. మధ్యలో రాజా చెయ్యి వేస్తే అంటూ తెలుగులో కూడా ఓ ప్రయత్నం చేసింది. ఇప్పుడీ అమ్మడి అడుగులు బాలీవుడ్ వైపు శరవేగంగా పడుతున్నాయి.

అక్షత్ వర్మ దర్శకత్వంలో సైఫ్ అలీ ఖాన్ హీరోగా తెరకెక్కే చిత్రంలో చోటు సంపాదించుకున్న ఈ సుందరాంగికి ఇప్పుడు సల్మాన్ ఖాన్ నుంచి బంపర్ ఆఫర్ వచ్చింది. కబీర్ ఖాన్ దర్శకత్వంలో బాలీవుడ్ కండలవీరుడు సల్మాన్ ఖాన్ నటిస్తున్న ట్యూబ్ లైట్ లో ఇషా తల్వార్ కి ఇంపార్టెంట్ రోల్ దక్కింది. ఈ చిత్రంలో చైనీస్ యాక్ట్రెస్ ఝుఝు లీడ్ హీరోయిన్ గా నటిస్తున్నా ఇషా తల్వార్ పాత్రకు చాలానే ప్రాధాన్యత ఉంటుందని అంటున్నారు.

బాలీవుడ్ లోకి అడుగుపెట్టిన మొదట్లోనే సైఫ్ తో పాటు సల్మాన్ మూవీలోనూ అవకాశం రావడంతో ఉబ్బితబ్బిబ్బవుతోంది ఇషా. 'కబీర్ ఖాన్ నా ఫేవరేట్ డైరెక్టర్. ఆయన తీసే ఒక సినిమాలో అయినా నటించాలన్నది నా జీవిత లక్ష్యం. ఇంత త్వరగా ఆ ఛాన్స్ రావడం.. అది కూడా సల్మాన్ ఖాన్ మూవీలో కావడంతో నా ఆనందానికి అడ్డు కట్ట వేయడం కష్టంగా ఉంది' అంటోంది ఇషా తల్వార్.



Like Us on Facebook : https://www.facebook.com/Tupakidotcom/