'ఆచార్య' లో బుట్టబొమ్మ రోల్ అలా ఉండబోతోందా..?

కొరటాల శివ దర్శకత్వంలో మెగాస్టార్ చిరంజీవి - మెగా పవర్ స్టార్ రామ్ చరణ్ కలిసి నటిస్తున్న సినిమా ''ఆచార్య''. ఇందులో చిరంజీవి సరసన కాజల్ అగర్వాల్ హీరోయిన్ గా నటిస్తుండగా.. చరణ్ కి జోడీగా స్టార్ హీరోయిన్ పూజాహెగ్డే నటిస్తోంది. ఇప్పటికే పూజా తన పాత్రకు సంబంధించిన చిత్రీకరణ పూర్తి చేసింది. అయితే తాజాగా ఆమె రోల్ గురించి ఓ న్యూస్ వినిపిస్తోంది.

'ఆచార్య' సినిమాలో పూజా హెగ్డే పాత్ర సుమారు 20 నిమిషాల పాటు ఉంటుందట. ద్వితీయార్థంలో వచ్చే ప్లాష్ బ్యాక్ ఎపిసోడ్ లో చరణ్ తో కలిసి కనిపిస్తుందని.. ఇద్దరి కాంబినేషన్లో ఓ పాట కూడా ఉంటుందని అంటున్నారు. అంతేకాకుండా పూజా రోల్ ఎమోషనల్ గా సాగుతుందని.. ఆమె పాత్ర చనిపోతుందని టాక్ నడుస్తోంది. ఇందులో నిజమెంతో తెలియాలంటే సినిమా విడుదలయ్యే వరకు ఆగాల్సిందే.

కాగా, చిరు - చరణ్ కలిసి నటిస్తున్న సినిమా కావడంతో 'ఆచార్య' పై మెగా అభిమానులు భారీ అంచనాలు పెట్టుకున్నారు. ఇప్పటి వరకు వదిలిన ప్రమోషనల్ కంటెంట్ ఆకట్టుకుంది. కొరటాల శైలిలో సామాజిక అంశానికి కమర్షియల్ హంగులు జోడించి ఈ సినిమా రూపొందుతోంది. కొణిదెల ప్రొడక్షన్స్ సమర్పణలో మాట్నీ ఎంటర్‌టైన్మెంట్స్ బ్యానర్ పై నిరంజన్ రెడ్డి ఈ చిత్రాన్ని నిర్మిస్తున్నారు. సమ్మర్ కానుకగా మే 13న వరల్డ్ వైడ్ గా 'ఆచార్య' రిలీజ్ కానుంది.