రజని సినిమాలో ఆఫర్ అడిగిన హాలీవుడ్ స్టార్

సోషల్ మీడియాలో జరిగే విషయాలు కొన్ని నమ్మశక్యంగా అనిపించవు. కానీ నిజం తెలుసుకున్నాక షాక్ తగలక మానదు. ఇది దర్శకుడు మురుగదాస్ కు స్వయానా అనుభవం లోకి వచ్చింది. ప్రస్తుతం సూపర్ స్టార్ రజనీకాంత్ తో దర్బార్ తీస్తున్న మురుగదాస్ ఇప్పటికే సగానికి పైగా షూటింగ్ పూర్తి చేశాడు. పోలీస్ ఆఫీసర్ గా విభిన్నమైన పాత్ర పోషిస్తున్న రజనికి జోడిగా నయనతార నటిస్తున్న సంగతి తెలిసిందే.

తాజాగా హాలీవుడ్ స్టార్ నటుడు బిల్ డ్యూక్ మురుగదాస్ ని ఉద్దేశించి ఓ ట్వీట్ చేశాడు. రజనికి చిన్నపుడు అమెరికాలో తప్పిపోయిన కజిన్ గానో లేదా నయనతార అంకుల్ గానో ఏదో ఒకటి తమిళ్ రాకపోయినా పర్వాలేదు ఒక్క ఛాన్స్ ఇమ్మని అడిగాడు. అంతేకాదు శ్రీకర్ ప్రసాద్ ఎడిటింగ్ తో తనను సరిచేసి అనిరుద్ రవిచందర్ సంగీతంలో ఒక పాట కూడా పెట్టమని ఓసారి ఆలోచించమని అడిగాడు

ఇది ముందు ఫేక్ అనుకున్న మురుగదాస్ తర్వాత ధీ బిల్ డ్యూక్ అఫీషియల్ అకౌంట్ నుంచే చేసిన ట్వీట్ అని తెలుసుకుని షాక్ అయ్యాడు. రీ ట్వీట్ చేస్తూ సర్ ఇది మీరేనా అడిగింది అంటూ ఆశ్చర్యంగా ఎక్స్ ప్రెషన్ ఎమోజి పెట్టాడు. బిల్ డ్యూక్ ప్రెడేటర్ - ఎక్స్ మెన్ లాస్ట్ స్టాండ్ - ట్విలైట్ సిరీస్ ద్వారా ఎంత పాపులారిటీ సంపాదించిన నటుడో అందరికి తెలిసిందే. ఇప్పుడు బిల్ నిజంగా రావాలే కానీ మురుగదాస్ అదిరిపోయే పాత్రనో క్యామియోనో పెట్టేస్తాడు. అందులో అనుమానం లేదు. ఇది చూసిన రజని ఫ్యాన్స్ మా హీరో రేంజ్ ఇదంటూ తెగ మురిసిపోతున్నారు