హిట్‌ రిపీట్‌ కాంబినేషన్‌ షురూ

కొన్ని కాంబినేషన్‌లు రిపీటవుతున్నాయంటే అభిమానుల్లో భారీ అంచనాలుంటాయి. అందునా సల్మాన్‌, అక్షయ్‌ కుమార్‌, హృతిక్‌ లాంటి స్టార్ల తో రిపీట్‌ కాంబినేషన్‌ లో సినిమాలు వస్తున్నాయంటే అంచనాలు తారాస్థాయికి చేరతాయి. అలాంటి ఆసక్తి కలిగించే కాంబినేషన్స్‌ గురించి ఈ టాపిక్‌.

షారూక్‌ ఖాన్‌-రోహిత్‌ శెట్టి కాంబినేషన్‌ లో సినిమా అంటే 'చెన్నయ్‌ ఎక్స్‌ ప్రెస్‌' గుర్తుకొస్తుంది. ఈ సినిమా బాక్సా ఫీస్‌ వద్ద బ్లాక్‌ బస్టర్‌ హిట్‌ కొట్టింది. దాదాపు 400కోట్లు పైగా వసూలు చేసింది. ఇప్పుడు ఇదే కాంబినేషన్‌ లో 'దిల్‌వాలే' తెరకెక్కుతోంది. ఈ చిత్రం బడ్జెట్‌ రూ.75కోట్లు. అంచనాలు 400కోట్లు పైగానే. రికార్డులు తిరగరాస్తుందన్న అంచనాలున్నాయి. డిడిఎల్‌ జె కాంబినేషన్‌ షారూక్‌ - కాజోల్‌ జంట రిపీటవుతుండడంతో అంచనాలు మరింత రెట్టించాయి. 2015 చివరిలో రిలీజ్‌ కానుంది ఈ చిత్రం.

హృతిక్‌ రోషన్‌ -అశుతోష్‌ గోవారికర్‌ కాంబినేషన్‌ లో సినిమా అంటే వెంటనే 'జోదా అక్భర్‌' గుర్తొస్తుంది. అత్యంత భారీ బడ్జెట్‌ తో లావిష్‌ గా తెరకెక్కించిన ఆ చిత్రం సంచలనాలెన్నో సృష్టించింది. ఇప్పుడు ఈ ఇద్దరి కలయికలోనే 'మొహంజోదారో' తెరకెక్కుతోంది. ఇది వచ్చే ఏడాది ఆగస్టు లో రిలీజ్‌ కానుంది.

అక్షయ్‌ కుమార్‌-ప్రభుదేవా కాంబినేషన్‌ అనగానే వాంటెడ్‌ గుర్తు కొస్తుంది. ఆ తర్వాత 'రౌడీ రాధోర్‌'తో మరో హిట్‌ కొట్టారు. ఇదే కాంబినేషన్‌ లో ఇప్పుడు సింగ్‌ ఈజ్‌ బ్లింగ్‌ తెరకెక్కుతోంది. ఈ చిత్రం బాలీవుడ్‌ లో భారీ వసూళ్లు సాధిస్తుందన్న అంచనాలున్నాయి. అక్టోబర్‌ లో ఈ సినిమా రిలీజవుతుంది.

కబీర్‌ ఖాన్‌ -యశ్‌ రాజ్‌ ఫిలింస్‌ కాంబినేషన్‌ లో 'కాబూల్‌ ఎక్స్‌ ప్రెస్‌', 'న్యూయార్క్‌' వంటి చిత్రాలు వచ్చాయి. ఇప్పుడు ముచ్చటగా మూడో చిత్రం 'భజరంగి భాయిజాన్‌' రిలీజై బ్లాక్‌ బస్టర్‌ హిట్‌ కొట్టింది. సల్మాన్‌ ఈ చిత్రంలో హీరోగా నటించాడు.