హర్భజన్ సింగ్ 'ఫ్రెండ్ షిప్' మోషన్ పోస్టర్ అదిరిందిగా..!

ఇండియన్ టాప్ స్పిన్ బౌలర్ హర్భజన్ సింగ్.. హీరో అవతారం ఎత్తి తన సెకండ్ ఇన్నింగ్స్ మొదలుపెట్టాడు. ఇన్నాళ్లు గ్రౌండ్‌లో.. యాడ్ ఫిలిమ్స్ లో సత్తా చూపించిన భజ్జీ.. ఇక తన యాక్టింగ్ టాలెంట్ వెండితెర పై చూపించడానికి సిద్ధం అవుతున్నాడు. ఈ విషయాన్ని ఇదివరకే స్వయంగా తానే సోషల్ మీడియాలో పంచుకున్నాడు. అంతేగాక తను నటించనున్న సినిమా పోస్టర్‌ను తన సోషల్ మీడియాలో షేర్ చేశాడు. భజ్జీ భాయ్ హీరోగా తెరకెక్కుతున్న సినిమా 'ఫ్రెండ్‌షిప్'. అయితే అది తమిళ సినిమా కావడం విశేషం. ఈ సినిమాకు జాన్ పాల్ రాజ్, షామ్ సూర్య దర్శకత్వం వహిస్తున్నారు. జేపీఆర్ స్టాలిన్ ఈ సినిమాను నిర్మిస్తున్నారు. అయితే ఈ సినిమాలో తమిళ బిగ్ బాస్ ఫేమ్ లోస్లియా మరియానేసన్ హీరోయిన్ గా నటిస్తుంది. గతంలో భజ్జి విడుదల చేసిన పోస్టర్ లో ఇద్దరు వ్యక్తుల చేతులకు బేడీలు వేసి ఉంది.

ఒక కీలక పాత్రలో యాక్షన్ కింగ్ అర్జున్ నటిస్తున్న ఈ చిత్రానికి సంబంధించి చిత్రయూనిట్ మోషన్ పోస్టర్‌ను విడుదల చేశారు. దక్షిణ భారతీయ సినిమాలో ఓ క్రికెటర్ ప్రధాన పాత్రలో నటిస్తున్న మొదటి చిత్రం ఇది. తాజాగా విడుదల చేసిన మోషన్ పోస్టర్ చాలా రిచ్‌గా ఉంది. ఈ సినిమా మంచి కథాంశంతో, అలాగే సాంకేతిక విలువలతో తెరకెక్కినట్లుగా ఈ మోషన్ పోస్టర్ చూస్తుంటే అర్ధమవుతుంది. ఈ ఏడాది థియేటర్లలో కూడా సందడి చేయనుందని భావిస్తున్నారు. అయితే భజ్జి.. బాలీవుడ్ నటి గీతా బస్రాను వివాహం చేసుకున్న సంగతి తెలిసిందే. గతంలో గీతాబస్రా నటించిన 'సెకండ్ హ్యాండ్ హస్బెండ్' సినిమాలో కూడా హర్భజన్ ఓ కీలక పాత్ర పోషించాడు. అయితే భజ్జి సినిమాల్లోకి రావడం వెనుక భార్య గీత సపోర్ట్ కూడా ఉందని తెలుస్తోంది. అయితే ఈ సినిమాని కేవలం తమిళంలోనే కాకుండా పలు బాషలలో విడుదల చేస్తారట. క్రికెట్ లో మ్యాజిక్ చేసిన భజ్జి థియేటర్స్‌లో ఎలా మాయ చేస్తాడో చూడాలి మరి!