100 సినిమాలు తీసే కేర‌ళకు ప్ర‌భుత్వ‌ ఓటీటీ! 250 సినిమాలు తీసే టాలీవుడ్ కి!?

బాహుబ‌లి ముందు బాహుబ‌లి త‌ర్వాత ఎలానో సినీఇండ‌స్ట్రీల్ని బ‌హుశా క‌రోనా ముందు క‌రోనా త‌ర్వాత అని విభ‌జించాలి. ఇప్పుడంతా ఓటీటీల యుగం న‌డుస్తోంది. ఓటీటీ ప‌రిధి అంత‌కంత‌కు విస్త‌రిస్తోంది. కార్పొరెట్ కంపెనీల ఓటీటీలు ప్ర‌బ‌లంగా ఉండ‌గానే కొంద‌రు సినీ నిర్మాతలు సొంత ఓటీటీల‌తో సిద్ధ‌మ‌వుతున్నారు. మ‌రికొంద‌రు హీరోలు ఈ రంగంలో ప్ర‌వేశిస్తూ వేడి పెంచేస్తున్నారు. ఇదిలా ఉంటే ఇటీవ‌ల త‌మిళ నిర్మాత‌ల మండ‌లి సొంత ఓటీటీకి ప్ర‌య‌త్నించ‌డం హాట్ టాపిక్ అయ్యింది. అయితే ఈ ప‌రిధి ఇంత‌టితో ఆగిపోడం లేదు. ఇప్పుడు ఏకంగా ప్ర‌భుత్వాలే సొంత ఓటీటీని ప్రారంభించి చిన్న సినిమాల‌ను క్రియేటివిటీని కాపాడేందుకు ప్ర‌య‌త్నిస్తుండ‌డం స‌ర్వ‌త్రా ఆస‌క్తిని పెంచుతోంది.

తాజాగా కేర‌ళ ప్రభుత్వం సొంత OTT ప్లాట్ ఫామ్ ను ప్రారంభించాలని యోచిస్తున్నట్లు ఆ రాష్ట్ర మంత్రివ‌ర్యులు ప్ర‌క‌టించారు. కళాత్మక విలువలు కలిగిన చిత్రాలను ప్రజల్లోకి తీసుకురావడమే లక్ష్యంగా
చిన్న సినిమాలను ప్రోత్సహించడానికి రాష్ట్ర ప్రభుత్వం సొంతంగా ఓవర్ ది టాప్ (ఒటిటి) ప్లాట్ ఫామ్ ను ప్రారంభించాలని లేదా ఇప్పటికే ఉన్న ప్లాట్ ఫామ్ తో కలిసి ఒక ఓటీటీని అమలు చేయాలని యోచిస్తున్నట్లు సాంస్కృతిక వ్యవహారాల మంత్రి సాజీ చెరియన్ తెలిపారు.

కేరళ యూనియన్ ఆఫ్ వర్కింగ్ జర్నలిస్ట్స్ (కెయుడబ్ల్యుజె) - కేసరి మెమోరియల్ జర్నలిస్ట్స్ ట్రస్ట్ ఇటీవ‌ల‌ నిర్వహించిన మీట్-ప్రెస్ కార్యక్రమంలో మాట్లాడుతూ అన్ని రకాల కళాత్మక విలువలను ప్రజల ముందుకు తీసుకురావడం ప్రభుత్వ లక్ష్యమ‌ని చెరియన్ అన్నారు. .

ఓటీటీ ప్లాట్ ఫామ్ ను సొంతంగా ప్రారంభించే అవకాశాన్ని లేదా ఇప్పటికే ఉన్న ప్లాట్ ఫాం సేవలను అద్దెకు తీసుకునే అవకాశాన్ని ప్రభుత్వం పరిశీలిస్తోంది. సాంస్కృతిక శాఖ కార్యదర్శి కేరళ రాష్ట్ర చలన చిత్ర అభివృద్ధి కార్పొరేషన్ మేనేజింగ్ డైరెక్టర్ కు సాధ్యాసాధ్యాలను అధ్యయనం చేసే బాధ్యత ఇచ్చామ‌ని మంత్రి వ‌ర్యులు అన్నారు.

ప్రస్తుత కోవిడ్ పరిస్థితిలో చిన్న బడ్జెట్ చిత్రాలకు ప్రేక్షకులను కనుగొనడంలో సహాయపడటానికి ప్రభుత్వ నియంత్రణలో ఉన్న OTT వేదిక ముఖ్యం. ఇప్పటికే థియేట్రికల్ రన్ పూర్త‌యిన‌ పెద్ద బడ్జెట్ చిత్రాలు కూడా ఈ వేదికపైకి రావచ్చు అని మిస్టర్ చెరియన్ అన్నారు. కేర‌ళ‌లోని చిత్రంజలి స్టూడియోను అన్ని రకాల చిత్రాలను చిత్రీకరించడానికి సౌకర్యాలను అభివృద్ధి చేసేందుకు 150 కోట్ల ప్రాజెక్టును చేప‌ట్ట‌నున్నామ‌న్నారు. ఇది పోస్ట్ ప్రొడక్షన్ హబ్ గా కూడా మారుతుంది. టెలివిజన్ సీరియల్స్ కళాత్మక విలువను మెరుగుపరచడానికి కొంత రకమైన జోక్యం అవసరమని మిస్టర్ చెరియన్ అన్నారు. ఇవి ప్రేక్షకులలో ఒక విభాగానికి మాత్రమే పరిమితం కాలేదు. వాటిని అన్ని రకాల ప్రేక్షకులను ఆకర్షించేలా మార్చాలి.

నాటకాలు- స్టేజ్ షోలతో సహా సాంస్కృతిక కార్యక్రమాలను ప్రజల్లోకి తీసుకురావడానికి ప్రభుత్వం ఆన్ లైన్ ప్లాట్ ఫాంను ప్రారంభించాలని అన్నారు. సాంస్కృతిక అకాడమీలు కమిటీల పనితీరు మెరుగుపడుతుంది. మతతత్వం- కులతత్వం -వరకట్నంతో సహా తిరోగమన ధోరణులను ఎదుర్కోవడానికి సాంస్కృతిక శాఖ కూడా ప్రధానంగా జోక్యం చేసుకుంటుంద‌ని మంత్రివ‌ర్యులు వివ‌రించారు.

నిజానికి ఇది ఎంతో గొప్ప నిర్ణ‌యం. ఆహ్వానించ‌దగిన ప‌రిణామం. కేర‌ళ ప్ర‌భుత్వ నిర్ణ‌యం నిజంగానే ఒక మేలుకొలుపు అని చెప్పాలి. ఇత‌ర ప‌రిశ్ర‌మ‌లు ఇదే మార్గాన్ని అనుస‌రించేలా అన్ని రాష్ట్ర ప్ర‌భుత్వాలు ఇలాంటి ఒక మంచి నిర్ణ‌యం తీసుకోవాల‌నే ఆకాంక్షిద్దాం.

యేడాదికి దాదాపు 100 సినిమాలు మాత్ర‌మే తెర‌కెక్కించే కేర‌ళ‌లో ప్ర‌భుత్వం ఇంత మంచి నిర్ణ‌యం తీసుకుంటే ఏడాదికి సుమారు 200-250 చిత్రాలు తెర‌కెక్కించే టాలీవుడ్ కోసం తెలుగు ప్ర‌భుత్వాలు ఏమీ చేయ‌లేవా? అందుకే కేసీఆర్ - వైయ‌స్ జ‌గ‌న్మోహ‌న్ రెడ్డి ప్ర‌భుత్వాలు ఆ దిశ‌గా సృజ‌నాత్మ‌క‌ అడుగులు వేస్తాయ‌ని చిన్న సినిమాని బ‌తికిస్తాయ‌ని క‌ళాకారులు ఆకాంక్షిస్తున్నారు. ఇక రిలీజ్ కాని చాలా సినిమాల్ని ఇదే వేదిక‌ల‌పై రిలీజ్ చేసి న‌ష్ట‌శాతాన్ని త‌గ్గించ‌డం ద్వారా సినీప‌రిశ్ర‌మ‌ల్ని బ‌తికించేందుకు ఆస్కారం ఉంటుంది. దేశం మొత్తం మీద అత్య‌ధిక సినిమాలు తెర‌కెక్కే తెలుగు చిత్ర‌సీమ‌లో చాలా చిన్న సినిమాలు రిలీజ్ ల‌కు నోచుకోకుండా థియేట‌ర్ స‌మ‌స్య‌ల‌తో కొట్టుమిట్టాడేవి. ఇలాంటి ఎంద‌రికో దారి చూపే అస్త్రం ప్ర‌భుత్వ సొంత ఓటీటీ. దీని కోసం సినీపెద్ద‌లు కూడా ప్ర‌భుత్వాల‌తో మంత‌నాలు సాగిస్తే ఎంతో బావుంటుంద‌ని `తుపాకి` సూచిస్తోంది.