గోపీచంద్ సరికొత్త అవతారంలో..

పేరేమో ‘ఆక్సిజన్’ అంటూ చాలా మోడర్న్ గా ఉంది.. కానీ పోస్టర్లు చూస్తే మాత్రం రెగ్యులర్ మాస్ సినిమాల్నే తలపిస్తున్నాయి. ఆ మధ్య ఎర్ర చొక్కాతో నడుచుకుంటూ వస్తున్న గోపీచంద్ లుక్ కు పర్వాలేదనిపించే రెస్పాన్స్ వచ్చింది. తాజాగా గోపీని ఎన్నడూ చూడని అవతారంలో చూపిస్తూ ఓ లుక్ రిలీజ్ చేశారు. ఆదివారం గోపీచంద్ పుట్టిన రోజు సందర్భంగా అతడికి విషెస్ చెబుతూ ఈ లుక్ వదిలారు. పట్టు పంచె.. చొక్కా తొడుక్కుని సరికొత్తగా కనిపిస్తున్నాడు గోపీ ఇందులో. ఎ.ఎం.రత్నం నిర్మాణంలో ఆయన తనయుడు జ్యోతికృష్ణ దర్శకత్వం వహిస్తున్న ఈ చిత్రంలో గోపీ సరసన రాశిఖన్నా.. మలయాళ భామ అను ఇమ్మాన్యుయెల్ జంటగా నటిస్తున్నారు.

ఈ సినిమా విశేషాల గురించి జ్యోతికృష్ణ మాట్లాడుతూ.. ‘‘మా యాక్షన్ హీరో గోపీచంద్ కు ముందుగా జన్మదిన శుభాకాంక్షలు. ఆయన హీరోగా మా బేనర్లో ప్రతిష్టాత్మకంగా రూపొందుతోన్న ‘ఆక్సిజన్’ ప్రస్తుతం చివరి షెడ్యూల్ చిత్రీకరణ జరుపుకుంటోంది. ఇటీవలే విడుదల చేసిన సినిమా ఫస్ట్ లుక్, మోషన్ పోస్టర్లకు మంచి రెస్పాన్స్ వచ్చింది. ఇప్పటి వరకు గోపీచంద్ చేయని డిఫరెంట్ సబ్జెక్టుతో యాక్షన్ థ్రిల్లర్ గా రూపొందుతోన్న ఈ చిత్రంలో ప్రముఖ నటుడు జగపతి బాబు కీలకపాత్రలో నటిస్తున్నారు. ఆయన పాత్ర సినిమాకు హైలైట్ గా నలుస్తుంది. యువన్ శంకర్ రాజా సంగీతం మరో ప్లస్ పాయింట్. త్వరలోనే ఆడియో విడుదలకు ప్లాన్ చేస్తున్నాం. సినిమాలో ప్రతి సన్నవేశం ఆసక్తికంరగా ఉంటుంది. అన్ని కార్యక్రమాలనూ పూర్తి చేసి వీలైనంత త్వరగా సినిమాను ప్రేక్షకుల ముందుకు తీసుకొస్తాం’’ అన్నాడు.