మళ్లీ అతడినే నమ్ముకున్న గోపీచంద్‌

హీరో గోపీచంద్‌ ఒక్క సస్సెస్‌ వస్తే మూడు నాలుగు ఫ్లాప్‌ లు అన్నట్లుగా కెరీర్‌ ను కొనసాగిస్తున్నాడు. ఈమద్య కాలంలో ఈయనకు ఆశించిన స్థాయిలో మంచి విజయమే దక్కలేదు. దాంతో గోపీచంద్‌ మళ్లీ విలన్‌ పాత్రలు చేస్తాడనే టాక్‌ కూడా వచ్చింది. అయితే హీరోగా ఇంకా ప్రయత్నాలు చేయాలని గోపీచంద్‌ భావిస్తున్నాడని తెలుస్తోంది. ప్రస్తుతం చేస్తున్న సినిమాతో పాటు గోపీచంద్‌ తనకు లక్‌ ఇచ్చిన దర్శకుడు శ్రీవాస్‌ తో సినిమాను చేసేందుకు ఓకే చెప్పాడు.

గోపీచంద్‌ - శ్రీవాస్‌ ల కాంబినేషన్‌ లో ఇప్పటి వరకు లక్ష్యం - లౌక్యం చిత్రాలు ప్రేక్షకులు ముందుకు వచ్చాయి. ఈ రెండు చిత్రాలు కూడా గోపీచంద్‌ కెరీర్‌ లో హిట్‌ సినిమాలుగా నిలిచాయి. దాంతో మరోసారి తనకు సక్సెస్‌ ఇస్తాడనే నమ్మకంతో గోపీచంద్‌ తన తర్వాత సినిమాను శ్రీవాస్‌ దర్శకత్వంలో చేయాలని ఫిక్స్‌ అయ్యాడు. అందుకోసం డేట్లు కూడా కేటాయించినట్లుగా సమాచారం అందుతోంది.

మరో వైపు శ్రీవాస్‌ ఈమద్య అంతగా రాణించలేక పోతున్నాడు. ‘సాక్ష్యం’ వంటి భారీ చిత్రాన్ని తెరకెక్కించి బాక్సాఫీస్‌ వద్ద బొక్క బోర్లా పడ్డాడు. అంతకు ముందు బాలయ్యకు కూడా ఫ్లాప్‌ ఇచ్చాడు. ఇలాంటి దర్శకుడు గోపీచంద్‌ తో సినిమా చేసి హ్యాట్రిక్‌ కొడతాడా అనేది ప్రస్తుతం ఆసక్తికరంగా మారింది. సెంటిమెంట్‌ కలిసి వచ్చి వీరి కాంబోలో మూవీ సక్సెస్‌ అయితే అది ఇద్దరికి కూడా మంచి బూస్ట్‌ అని చెప్పుకోవచ్చు.