శ్రియా కు 'గమనం' టీమ్ బర్త్ డే విషెస్.. కమల ప్రయాణం ఎటువైపు..?

టాలీవుడ్ లో 'నా ఇష్టం' సినిమాతో ఎంట్రీ ఇచ్చిన అందాల శ్రియా శరణ్.. రెండు దశాబ్దాలుగా హీరోయిన్ గా హవా కొనసాగిస్తోంది. తెలుగు తమిళ కన్నడ మలయాళ హిందీ భాషల్లో ఎన్నో సినిమాలు చేసిన ఈ భామ.. ఇప్పటికీ లీడ్ రోల్స్ లో నటించే అవకాశం అందుకుంటోంది. చిరంజీవి - నాగార్జున - బాలయ్య - వెంకటేష్ వంటి సీనియర్ హీరోల సరసన నటించిన శ్రీయా.. మహేష్ బాబు - పవన్ కళ్యాణ్ - రవితేజ - ప్రభాస్ - ఎన్టీఆర్ వంటి హీరోలతో కూడా ఆడిపాడింది. అంతేకాకుండా శర్వానంద్ - అల్లరి నరేష్ - తరుణ్ వంటి యువ హీరోల సరసన మెరిసింది. పెళ్లి తర్వాత కూడా వరుస అవకాశాలు అందుకుంటున్న ఈ బ్యూటీ.. ప్రస్తుతం ''గమనం'' అనే సినిమాలో నటిస్తోంది.

నేడు (సెప్టెంబర్ 11) శ్రియా శరణ్ పుట్టినరోజు సందర్భంగా 'గమనం' చిత్ర బృందం ఆమెకు శుభాకాంక్షలు తెలుపుతూ ఓ గ్లిమ్స్ రిలీజ్ చేసింది. ఇందులో కమల అనే సాధారణ గృహిణి పాత్రలో శ్రీయా కనిపించనుంది. ఈ వీడియోలో కమల తన బిడ్డకు స్నానం చేయిస్తూ ఆలనాపాలనా చూసుకుంటోంది. చెవిటి మిషన్ పెట్టుకోవడం చూస్తే, ఈ చిత్రంలో శ్రియా వినికిడి లోపం ఉన్న మహిళగా కనిపించనుందని అర్థం అవుతోంది. ఎన్నో గ్లామరస్ రోల్స్ తో అలరించిన సీనియర్ హీరోయిన్.. ఇందులో నటనకు ప్రాధాన్యత ఉన్న పాత్రలో నటించిందని తెలుస్తోంది. మరి ఈ చిత్రం శ్రియా కు ఎలాంటి గుర్తింపు తెచ్చిపెడుతుందో చూడాలి.

''గమనం'' చిత్రానికి సుజనా రావు దర్శకత్వం వహించారు. రియల్ లైఫ్ ఇన్సిడెంట్స్ ఆధారంగా ఆసక్తికరమైన కథాంశంతో ఈ సినిమా రూపొందింది. ఇందులో 'టాక్సీవాలా' ఫేమ్ ప్రియాంక జవాల్కర్ - శివ కందుకూరి - నిత్యా మీనన్ ఇతర కీలక పాత్రల్లో నటించారు. ఇప్పటికే ఈ చిత్రం నుంచి విడుదలైన ప్రమోషనల్ కంటెంట్ కు మంచి స్పందన వచ్చింది. నిర్మాణాంతర కార్యక్రమాలు పూర్తి చేసుకున్న ఈ చిత్రాన్ని త్వరలోనే థియేట్రికల్ రిలీజ్ చేస్తున్నట్లు మేకర్స్ ప్రకటించారు.

పాన్ ఇండియా స్థాయిలో తెలుగు, తమిళ, కన్నడ, మలయాళం, హిందీ భాషల్లో 'గమనం' సినిమా విడుదల కానుంది. మాస్ట్రో ఇళయరాజా ఈ చిత్రానికి సంగీతం సమకూర్చారు. సాయి మాధవ్ బుర్రా సంభాషణలు రాసారు. జ్ఞాన శేఖర్ వి.ఎస్. సినిమాటోగ్రఫీ అందించారు. క్రియా ఫిలిం కార్పొరేషన్ - కాళీ ప్రొడక్షన్స్ బ్యానర్స్ పై సినిమాటోగ్రాఫర్ జ్ఞానశేఖర్ - రమేష్ కరుటూరి - వెంకీ పుషడపు సంయుక్తంగా ఈ చిత్రాన్ని నిర్మించారు.