చైతు ట్రైలర్ - నాగ్ సాంగ్ వాయిదా

ఈ రోజు అక్కినేని నాగార్జున పుట్టిన రోజు. ఈ సందర్భంగా అభిమానులకు - తెలుగు ప్రేక్షకులకు రెండు కానుకలు సిద్ధమయ్యాయి. అందులో ఒకటి నాగ చైతన్య సినిమా 'శైలజా రెడ్డి అల్లుడు' ట్రైలర్ కాగా రెండోది నాగార్జున - నాని కలిసి నటించిన 'దేవదాస్' సినిమా నుండి మొదటి సింగిల్. కానీ ఈరోజు ఉదయం నందమూరి హరికృష్ణ నల్గొండ వద్ద యాక్సిడెంట్ లో మరణించడంతో ఈ ట్రైలర్ - సాంగ్ రిలీజ్ ను వాయిదా వేశారు.

'దేవదాస్' సినిమా ఫస్ట్ సింగల్ ను ఈరోజు ఉదయం 10 గంటలకు విడుదల చేస్తున్నట్టుగా నిన్న చిత్ర నిర్మాతలయిన వైజయంతి మూవీస్ వారు ప్రకటించిన విషయం తెలిసిందే. హరి కృష్ణ మరణ వార్త తెలిసిన తర్వాత ఆదిత్య మ్యూజిక్ వారు తమ అధికారిక ట్విట్టర్ హ్యాండిల్ ద్వారా నందమూరి కుంటుంబ సభ్యులకు ప్రగాఢ సానుభూతి తెలుపుతూ తమ పాట విడుదల కార్యక్రమాన్ని వాయిదా వేసినట్టు వెల్లడించారు.

మరోవైపు 'శైలజా రెడ్డి అల్లుడు' నిర్మాతలయిన సితార ఎంటర్ టైన్ మెంట్స్ బ్యానర్ వారు కూడా ట్విట్టర్ ద్వారా "నందమూరి హరికృష్ణ గారి మరణం దురదృష్టకరం... మీరు ఎప్పటికీ గుర్తుండి పోతారు సర్.. ఓ గొప్ప మనిషికి గౌరవ సూచకంగా మా సినిమా ట్రైలర్ లాంచ్ ను వాయిదా వేస్తున్నాము. త్వరలో కొత్త డేట్ ను ప్రకటిస్తాం" అని తెలిపారు.