'రిపబ్లిక్' కోసం మూడో ఫైల్ రిలీజ్ చేసిన దేవ కట్టా!

సాయితేజ్ హీరోగా దేవ కట్టా 'రిపబ్లిక్' సినిమాను రూపొందించాడు. భగవాన్ - పుల్లారావు నిర్మించిన ఈ సినిమాను అక్టోబర్ 1వ తేదీన థియేటర్లలో రిలీజ్ చేయనున్నారు. దాంతో ఈ సినిమా ప్రమోషన్స్ లో దేవ కట్టా బిజీగా ఉన్నాడు. తనదైన స్టైల్లో ఆయన ఈ సినిమా ప్రమోషన్స్ చేస్తుండటం విశేషం. అవినీతి పరులైన రాజకీయ నాయకులను ఎదిరించే ఒక నిజాయితీ పరుడైన కలెక్టర్ చుట్టూ ఈ కథ తిరుగుతుంది. అందువలన నిజాయితీ పరులైన ఒక్కో కలెక్టర్ పై ఒక్కో వీడియో చేస్తూ, 'థ్యాంక్యూ కలెక్టర్' టైటిల్ తో వాటిని ప్రమోషన్స్ లో భాగంగా వదులుతున్నాడు.

అలా తాజాగా ఆయన మూడవ ఫైల్ అంటూ, 'రజనీ శేఖ్రీ సైబల్ ' పై ఒక వీడియో చేసి రిలీజ్ చేశారు. కొంతకాలం క్రితం హర్యానాలో జరిగిన ఒక భారీ స్కామ్ ను ఆమె అత్యంత ధైర్య సాహసాలతో బయటపెట్టారు. ప్రాణాలకు తెగించి తన పోరాటాన్ని కొనసాగించారు. అవినీతి పరులైన రాజకీయ నాయకులకు .. అధికారులకు శిక్ష పడేలా చేశారు. ఈ విషయంతో కూడిన వీడియో చూస్తుంటే, ఈ సినిమాలో సాయితేజ్ పాత్ర కూడా ఇదే తరహాలో ఉండనుందనే విషయం అర్థమవుతోంది. సామాజిక సందేశం ఉండనుందనే విషయం స్పష్టమవుతోంది.

కలెక్టర్ గా సాయితేజ్ నటించిన ఈ సినిమాలో, పవర్ఫుల్ పొలిటికల్ లీడర్ పాత్రలో రమ్యకృష్ణ కనిపించనుంది. ఆమె పాత్ర ఈ సినిమాకి హైలైట్ గా నిలుస్తుందని అంటున్నారు. జగపతిబాబు మరో ముఖ్యమైన పాత్రను పోషించారు. మణిశర్మ సంగీతం ఈ సినిమాకి ప్రత్యేక ఆకర్షణగా నిలుస్తుందని అంటున్నారు. ఇప్పటికే ఈ సినిమా నుంచి వచ్చిన సాంగ్స్ కి మంచి రెస్పాన్స్ వచ్చింది. కొంతకాలంగా సాయితేజ్ సరైన హిట్ కోసం వెయిట్ చేస్తున్నాడు. ఈ సినిమా ఆ స్థాయి హిట్ ను అందిస్తుందేమో చూడాలి మరి.