వర్కింగ్ టైటిల్ పై కంగారెందుకో!!

మెగాస్టార్ చిరంజీవి తన 150 సినిమాని ఫైనల్ చేసేశారు. త్వరలో షూటింగ్ కూడా ప్రారంభం కానుందని తెలుస్తోంది. రీసెంట్ గా రామ్ చరణ్ బర్త్ డే నాడు చిరంజీవి బ్లడ్ బ్యాంక్ కు అందిన బ్లడ్ డొనేషన్స్ పై మాట్లాడుతున్నపుడు.. మరికొన్ని సంగతులు అభిమానులతో పంచుకున్నారు చిరు. వివి వినాయక్ డైరెక్షన్ లో కోలీవుడ్ మూవీ కత్తికి రీమేక్ గా తెరకెక్కనున్న ఈ చిత్రానికి 'కత్తిలాంటోడు' అనే టైటిల్ అనుకుంటున్నట్లు చెప్పారు.

ఇది వర్కింగ్ టైటిల్ అనే విషయాన్ని స్పష్టంగానే చెప్పారు మెగాస్టార్. అయితే.. ఈ టైటిల్ అంత పవర్ ఫుల్ గా లేదనే మాట వినిపిస్తోంది. ఇది నిజమే కావచ్చు కానీ.. అసలు టైటిల్ ఇదే అనే విషయాన్ని వెల్లడించలేదు. ఓ సినిమాని స్టార్ట్ చేసేటపుడు రకరకాల పేర్లను వదులతూ ఉంటారు. ఆడియన్స్ రెస్పాన్స్ ను బట్టి చివర్లో డిసైడ్ చేసుకుంటారు. ఈ విషయం అందరికీ తెలిసిందే. ఒరిజినల్ గా కత్తి టైటిల్ విషయంలో గతంలో కూడా రచ్చ జరిగింది. కళ్యాణ్ రామ్ - గుణశేఖర్ ల మధ్య ఓపెన్ వివాదమే నెలకొంది. చివరకు తన చిత్రానికి కళ్యాణ్ రామ్ కత్తి అని ఫిక్స్ చేసుకున్నాడనే విషయం తెలిసిందే.

మరిప్పుడు అదే కత్తి టైటిల్ ని చిరంజీవి సినిమాకి ఉపయోగిస్తారని అనుకోవడం భ్రమే. అంతకంటే పవర్ పుల్ గా ఉండే టైటిల్ ని సెట్ చేసుకుంటారని చెప్పచ్చు. ఈలోగా ఫీలర్స్ కోసం రకరకాల టైటిల్స్ వినిపిస్తూనే ఉంటాయి. అప్పటివరకూ ఎవరికీ కంగారు అవసరం లేదు.