బెల్లంకొండ శీను.. బోయపాటికి సెటైరా?

‘అల్లుడు శీను’ సినిమాతో టాలీవుడ్ లోకి గ్రాండ్ ఎంట్రీ ఇచ్చాడ బెల్లంకొండ శ్రీనివాస్. పెద్ద ఫ్యామిలీల హీరోలకు కూడా అరంగేట్రంలో పెట్టనంత భారీ ఖర్చు అతడి తొలి సినిమాకు పెట్టాడు బెల్లంకొండ సురేష్. పెట్టుబడితో పోలిస్తే నష్టాలొచ్చినా ఆ సినిమా మాత్రం బాగానే

ఆడింది. కుర్రాడి రెండో సినిమా కూడా భారీగానే ప్లాన్ చేశారు కానీ.. బెల్లంకొండ ఆర్థిక ఇబ్బందుల్లో చిక్కుకోవడంతో వర్కవుట్ కాలేదు. తాను కోరుకున్న బడ్జెట్ ఇవ్వకపోవడంతో బోయపాటి శ్రీను ఆ సినిమా నుంచి తప్పుకున్నాడు. అల్లు అర్జున్ తో ‘సరైనోడు’ సినిమా చేసుకున్నాడు. మరోవైపు శ్రీనివాస్.. భీమనేని శ్రీనివాసరావు దర్శకత్వంలో ఓ సినిమా మొదలుపెట్టాడు.

ఐతే బోయపాటి తమ సినిమా నుంచి వెళ్లిపోవడం వల్ల హర్టయి.. అతడికి రిటార్ట్ ఇవ్వడానికో ఏమో కానీ.. బోయపాటి సినిమా టైటిల్ తరహాలోనే శ్రీనివాస్ సినిమాను పేరు పెట్టుకున్నారు. ఈ సినిమా టైటిల్ ‘స్పీడున్నోడు’ అట. తమిళ సూపర్ హిట్ మూవీ ‘సుందరపాండ్యన్’కు రీమేక్ గా తెరకెక్కుతున్న ఈ చిత్రంలో శ్రీనివాస్ సరసన సోనారికా బడోరియా కథానాయికగా నటిస్తోంది. తెలుగు నేటివిటీకి తగ్గట్లు స్క్రిప్టులో మార్పులు చేసినట్లు చెబుతున్నారు. టాకీ పార్ట్ పూర్తి కావస్తున్న ఈ సినిమాను వచ్చే ఏడాది ఫిబ్రవరిలో విడుదల చేయాలని భావిస్తున్నారు. భీమనేనితో కలిసి బెల్లంకొండ ఈ సినిమాను నిర్మిస్తున్నాడు.