'అతిధి దేవోభవ' నుంచి అందమైన ప్రేమ గీతం..!

యంగ్ హీరో ఆది సాయి కుమార్ హిట్ ప్లాప్ లను పట్టించుకోకుండా వరుసగా సినిమాలు చేసుకుంటూ వెళ్తున్నారు. ఆది లైనప్ లో ఉన్న లవ్ అండ్ యాక్షన్ థ్రిల్లర్ ''అతిధి దేవోభవ''. నాగేశ్వర్ పొలిమేర ఈ చిత్రానికి దర్శకత్వం వహిస్తున్నారు.

ఇందులో నువేక్ష హీరోయిన్ గా నటించింది. ఇప్పటికే ఈ సినిమా నుంచి విడుదలైన ఫస్ట్ లుక్ పోస్టర్ సినిమాపై ఆసక్తిని కలిగించింది. అలానే సిద్ శ్రీరామ్ ఆలపించిన 'బాగుంటుంది నువ్వు నవ్వితే' అనే పాట శ్రోతలను విశేషంగా ఆకట్టుకుంది.

ఈ క్రమంలో తాజాగా 'అతిధి దేవోభవ' చిత్రం నుంచి 'గాజుబొమ్మ తీరున' అనే మరో సాంగ్ లిరికల్ వీడియోని చిత్ర బృందం రిలీజ్ చేసింది. శేఖర్ చంద్ర ఈ గీతానికి ఫ్రెష్ మెలోడీ ట్యూన్ ని సమకూర్చారు.

'గాజు బొమ్మ తీరున.. చూసే గుండె నీదిరా.. గాయమైతే చూడలేవు. గారమంటే నీదిరా' అంటూ సాగిన ఈ పాట ప్రేక్షకులను అలరిస్తోంది. ప్రేమలో మునిగి తేలుతున్న యువతీ యువకులు తమ భావాలను తెలియజెప్పేలా లిరిసిస్ట్ కృష్ణ కాంత్ ఈ ప్రేమ గీతానికి సాహిత్యం అందించారు.

హృతిక ఆనంది - రితేష్ రావు కలిసి ఈ పాటను వినసొంపుగా ఆలపించారు. ఈ పాటలో ఆది సాయికుమార్ - నువేక్ష మధ్య కెమిస్ట్రీ బాగుంది. ఈ చిత్రానికి అమరనాధ్ బొమ్మిరెడ్డి దీనికి సినిమాటోగ్రఫీ అందించగా.. కార్తీక్ శ్రీనివాస్ ఎడిటింగ్ వర్క్ చేశారు. 'అతిధి దేవోభవ' చిత్రానికి వేణు గోపాల్ రెడ్డి కథ అందించగా.. రజనీ రాజబాబు స్క్రీన్ ప్లే - మాటలు రాశారు.

రామ సత్యనారాయణ రెడ్డి సమర్పణలో శ్రీనివాస సినీ క్రియేషన్స్ బ్యానర్ పై రాజబాబు మిర్యాల - అశోక్ రెడ్డి మిర్యాల సంయుక్తంగా ఈ చిత్రాన్ని నిర్మిస్తున్నారు.

ఇందులో రోహిణి - సప్తగిరి - సూర్య - ఆదర్శ్ - రవి ప్రకాష్ - రఘు కారుమంచు - మణిచందన - భెల్ ప్రసాద్ - గుండు సుదర్శన్ - ప్రియాంక - నవీనా రెడ్డి - సత్తిపండు - ఇమ్మాన్యుయేల్ తదితరులు ఇతర పాత్రలు పోషించారు. ఇప్పటికే షూటింగ్ పూర్తి చేసుకున్న 'అతిధి దేవోభవ' చిత్రాన్ని త్వరలోనే ప్రేక్షకుల ముందుకు తీసుకురావాలని మేకర్స్ ప్లాన్ చేస్తున్నారు.