బాలయ్య డ్యాన్స్.. ఎవరితో?

తన వందో సినిమాకు ముందు లాగే 101వ సినిమా విషయంలోనూ కొన్నాళ్ల పాటు అందరినీ సస్పెన్సులో పెట్టి.. సడెన్‌గా సినిమా అనౌన్స్ చేసేసి రంగంలోకి దిగిపోయాడు నందమూరి బాలకృష్ణ. పూరి దర్శకత్వంలో బాలయ్య చేస్తున్న కొత్త సినిమా శరవేగంగా షూటింగ్ జరుపుకుంటోంది. పది రోజుల్లోనే తొలి షెడ్యూల్ పూర్తి చేసుకున్న ఈ చిత్రం.. రెండో షెడ్యూల్లోకి వెళ్లిపోయింది. సమ్మర్లో కూడా బ్రేక్ లేకుండా షూటింగ్ చేసేస్తున్నారు.

అప్పడే ఈ సినిమా పాటల మోడ్ లోకి వచ్చేయడం విశేషం. ఈ చిత్రానికి సంగీత దర్శకుడిగా అనూప్ రూబెన్స్ కన్ఫమ్ అయి నెల కూడా కాలేదు. అప్పుడే అతను ఓ పాట రెడీ చేసేశాడు. ‘‘నిన్ను చూస్తూ ఉంటే నాకేదో అవుతున్నట్టున్నాదే.. గుండెల్లో గోలీసోడా కొట్టేసినట్టున్నాదే’.. అంటూ పీఆర్వో కమ్ లిరిసిస్ట్ పులగం చిన్న నారాయణ రాసిన పాట చిత్రీకరణ కూడా మొదలైంది. నాలుగు రోజుల పాటు ఈ పాట తీస్తారు.

పూరి సినిమాలో బాలయ్య సరసన శ్రియతో పాటు మిస్కిన్ అనే కొత్తమ్మాయి కథానాయికగా నటిస్తున్న సంగతి తెలిసిందే. శ్రియ ఇంకా ఈ సినిమా షూటింగ్ లోకి రాలేదు. బాలయ్యతో కలిసి ఇప్పుడు స్టెప్పులేస్తోంది మిస్కినే. బాలయ్య-పూరి కాంబినేషన్ అనగానే అభిమానుల్లో భారీ అంచనాలు ఏర్పడ్డాయని.. వాటిని అందుకునేలా ఈ సినిమా ఉంటుందని.. త్వరలోనే టైటిల్ ప్రకటిస్తామని నిర్మాత భవ్య ఆనంద్ ప్రసాద్ తెలిపారు. ఈ చిత్రాన్ని సెప్టెంబరు 30న రిలీజ్ చేయబోతున్నట్లు ఇంతకుముందే ప్రకటించిన సంగతి తెలిసిందే.

Like Us on Facebook : https://www.facebook.com/Tupakidotcom/