అమరావతి లో మొదటి ఆడియో ఫంక్షన్

రాష్ట్ర విభజనకు ముందు ఆడియో లాంచ్ లన్నీ దాదాపుగా హైదరాబాద్ లోనే జరిగేవి. విభజన తర్వాత సినిమా ఆడియో ఫంక్షన్లు జరిగే తీరులో మార్పులు వచ్చేశాయి. మొన్నటిదాకా ఆడియో ఫంక్షన్లను హైదరాబాద్ లోనే నిర్వహించే వారికి భిన్నంగా ఇప్పుడు రెండు రాష్ట్రాల్లోనూ చేస్తున్నారు. తాజాగా నందమూరి బాలయ్య ఒక అరుదైన రికార్డును తన ఖాతాలో వేసుకోనున్నారు.

ఏపీ రాజధాని అమరావతిలో తన తాజా చిత్రం డిక్టేటర్ సినిమా ఆడియో ఫంక్షన్ ను నిర్వహించనున్నారు. బాలయ్యబాబు 99వ సినిమా అయిన డిక్టేటర్ చిత్ర యూనిట్ ప్రస్తుతం బల్గేరియా షెడ్యూల్ లో బిజీగా ఉంది. అందాల భామలు సోనాలి చౌహాన్.. అంజలిలతో జత కట్టనున్న బాలయ్య డిక్టేటర్ పై చాలానే అంచనాలున్నాయి.

తన తాజా చిత్ర ఆడియో ఫంక్షన్ ను ఏపీ రాజధాని నగరమైన అమరావతిలో నిర్వహించేందుకు బాలయ్య పచ్చజెండా ఊపేసినట్లు చెబుతున్నారు. మరోవైపు.. ఈ సినిమా ఫస్ట్ లుక్ ను సెప్టెంబరు 17న వినాయకచవితి పండగ సందర్భంగా విడుదల చేయనున్నారు. మొత్తానికి ఈ వినాయక చవితి బాలయ్య అభిమానులకు డబుల్ థమాకా కానుందన్న మాట.