మోషన్ పోస్టర్: కౌబాయ్ గా మహేష్ మేనల్లుడు..!

సూపర్ స్టార్ కృష్ణ మనవడు.. మహేష్ బాబు మేనల్లుడు.. ఎంపీ గల్లా జయదేవ్ కుమారుడైన గల్లా అశోక్ హీరోగా ఎంట్రీ ఇస్తున్న సంగతి తెలిసిందే. ఇంకా టైటిల్ ఖరారు చేయని ఈ చిత్రంలో ఇస్మార్ట్ బ్యూటీ నిధి అగర్వాల్ హీరోయిన్ గా నటిస్తోంది. 'భలే మంచి రోజు' 'శమంతకమణి' 'దేవదాస్‌' వంటి చిత్రాలతో గుర్తింపు తెచ్చుకున్న యువ దర్శకుడు శ్రీరామ్ ఆదిత్య ఈ సినిమాని తెరకెక్కిస్తున్నాడు. కృష్ణ పుట్టినరోజు సందర్భంగా ఈ చిత్రం నుంచి 'జుంబారే జుమ్ జుంబారే' రీమిక్స్ సాంగ్ విడుదల చేసి.. తాత ని అశోక్ భలే ఇమిటేట్ చేశాడే అనిపించుకున్నాడు. ఈ క్రమంలో నేడు అశోక్ బర్త్ డే కానుకగా ఈ సినిమా మోషన్ పోస్టర్ ని రిలీజ్ చేశారు.

మహేష్ బాబు ట్విట్టర్ వేదికగా ఈ పోస్టర్ ని విడుదల చేసి, ఇది సూపర్ కూల్ గా ఉందని.. ఆన్ స్క్రీన్ లో నిన్ను చూడటానికి ఆసక్తిగా ఎదురుచూస్తున్నానని.. రాకింగ్ ఇయర్ ముందుందని పేర్కొన్నారు. ఈ మోషన్ పోస్టర్ లో గల్లా అశోక్ కౌబాయ్ గెటప్ లో కనిపిస్తున్నాడు. గతంలో కృష్ణ - మహేష్ ఇద్దరూ కౌబాయ్ గెటప్ లో కనిపించి అలరించిన సంగతి తెలిసిందే. ఇప్పుడు వారి నటవారసుడు ఒకే పోస్టర్ తో ఇద్దరు సూపర్ స్టార్స్ ని కవర్ చేశాడని ఫ్యాన్స్ కామెంట్స్ పెడుతున్నారు. ఉగాదికి ఈ సినిమా టైటిల్ లాంచ్ ఉంటుందని మేకర్స్ ప్రకటించారు.

ఇకపోతే ఈ చిత్రానికి జిబ్రాన్ సంగీతం సమకూరుస్తున్నారు. రిచర్డ్‌ ప్రసాద్‌ సినిమాటోగ్రఫీ బాధ్యతలు నిర్వర్తిస్తున్నారు. ఈ సినిమాలో జగపతి బాబు - సీనియర్ నరేశ్ ప్రధాన పాత్రలు పోషిస్తున్నారు. సూపర్ స్టార్ కృష్ణ - గల్లా అరుణకుమారి సమర్పిస్తున్న ఈ చిత్రాన్ని అమ‌ర్‌ రాజా మీడియా అండ్ ఎంట‌ర్‌టైన్‌మెంట్ బ్యాన‌ర్‌ పై ప‌ద్మావ‌తి గ‌ల్లా నిర్మిస్తున్నారు.