మహేష్ కోసం కబాలి బ్రదర్స్

అసలే ‘బ్రహ్మోత్సవం’ డిజాస్టర్ అయిన డిప్రెషన్లో ఉన్నాడు మహేష్ బాబు. ఇలాంటపుడు ‘కబాలి’తో లింకేంటి అంటారా..? ఐతే ఇలాంటి సెంటిమెంట్లేమీ పెట్టుకోకుండా మురుగదాస్ మాత్రం ‘కబాలి’ టెక్నీషియన్లు ఇద్దరిని మహేష్ సినిమా కోసం తీసుకున్నాడు. మన తెలుగులో రామ్-లక్ష్మణ్ బ్రదర్స్ లాగే.. తమిళంలోనూ అన్బు-అరసు అనే ఇద్దరు ఫైట్ మాస్టర్లు ఉన్నారు. వాళ్లిద్దరూ కూడా కవల సోదరులే కావడం విశేషం. ప్రస్తుతం తమిళంలో వీళ్లిద్దరూ మాంచి రైజింగ్ లో ఉన్నారు. ‘కబాలి’ సినిమాకు ఫైట్స్ కంపోజ్ చేసింది వాళ్లే. ఆ ట్విన్ బ్రదర్సే మహేష్-మురుగ సినిమాకు యాక్షన్ డిజైన్ చేస్తున్నారు. కొన్ని రోజుల కిందటే మహేష్ సినిమా రెగ్యులర్ షూటింగ్ ఆరంభమైన సంగతి తెలిసిందే.

ప్రస్తుతం హైదరాబాద్ లో నైట్ ఎఫెక్టులో కొన్ని యాక్షన్ సన్నివేశాలు చిత్రీకరిస్తున్నారు. అన్బు-అరసు ఈ సినిమా కోసం స్టైలిష్ యాక్షన్ సీక్వెన్స్ డిజైన్ చేశారట. తొలి రోజు షూటింగ్ కోసం మహేష్ క్లాస్ గా తయారై వచ్చిన సంగతి తెలిసిందే. ఆ అవతారంలోనే ఫైట్లు చేస్తున్నాడట. మహేష్ సినిమాల్లో ఇంతకుముందెన్నడూ చూడని విధంగా ఈ ఫైట్లు ఉంటాయని అంటున్నారు. హైదరాబాద్ లో పది రోజుల షెడ్యూల్ పూర్తయ్యాక ఈ చిత్ర యూనిట్ పుణె.. ముంబయి నగరాలకు వెళ్లనుంది. అక్కడ కూడా షూటింగ్ అయ్యాక బ్రేక్ తీసుకుని.. భారీ షెడ్యూల్ కోసం గుజరాత్ కు వెళ్లబోతున్నారు. వచ్చే ఏడాది వేసవికి ఈ సినిమా రిలీజ్ ప్లాన్ చేస్తున్నారు. రకుల్ ప్రీత్ సింగ్ కథానాయికగా నటిస్తున్న ఈ సినిమాలో ఎస్.జె.సూర్య విలన్ పాత్ర పోషిస్తున్నాడు. ఎన్వీప్రసాద్-ఠాగూర్ మధు నిర్మాతలు.