పవన్.. బన్నీ అక్కడ కలుస్తారా?

ఫిలిం ఇండస్ట్రీలో ఎవరు ఏం మాట్లాడినా.. అందులో ఇప్పుడు రంగస్థలం ఉంటోందంటే ఆశ్చర్యం ఏమీ లేదు. ఇండస్ట్రీ హిట్ దిశగా దూసుకుపోతున్న సినిమా గురించి ఆ మాత్రం చెప్పుకోవడంలో ఆశ్చర్యం లేదు. పైగా సినిమాలు మానేశానని చెప్పిన పవర్ స్టార్ కూడా.. రీసెంట్ గా రంగస్థలం మూవీని చూశాడు. అబ్బాయ్ చెర్రీ ఏర్పాటు చేసిన స్పెషల్ స్క్రీనింగ్ ను చూసిన బాబాయ్ పవన్ కళ్యాణ్.. రంగస్థలం సక్సెస్ మీట్ కు తాను కచ్చితంగా వస్తానని కూడా అన్నాడు.

అయితే.. ఈ సినిమా గురించి ఇప్పటివరకూ సోషల్ మీడియాలో స్పందించని వ్యక్తి ఎవరైనా ఉన్నారా అంటే.. అది అల్లు అర్జున్ మాత్రమే. నిజానికి సోషల్ మీడియా స్పందించకపోయినా.. రీసెంట్ గా తన బర్త్ డే సందర్భంగా ఓ తెలుగు డైలీకి ఇచ్చిన ఇంటర్వ్యూలో మాత్రం రంగస్థలం మూవీ గొప్పదనం గురించి బాగానే చెప్పాడు బన్నీ. అయితే.. ఇప్పుడు రంగస్థలం సక్సెస్ మీట్ కు అల్లు అర్జున్ కూడా రాబోతున్నాడని తెలుస్తోంది. చరణ్ సినిమా గురించి ఒకట్రెండు ట్వీట్స్ పెడితే సరిపోదని ఫీలయ్యాడట బన్నీ.

పవన్ కళ్యాణ్ తో పాటు అల్లు అర్జున్ కూడా రామ్ చరణ్ మూవీ రంగస్థలం సక్సెస్ మీట్ లో కనిపిస్తారనే సంగతి ఖాయం అయిపోయింది. ఎలాగూ చిరంజీవి వస్తారనే చెప్పాల్సిన పనే లేదు. మిగిలిన మెగా హీరోలు కూడా ఈ ఈవెంట్ లో సందడి చేసే అవకాశం ఉంది. మరి రంగస్థలం విజయోత్సవ వేడుక సందర్భంగా.. మెగా హీరోలు అంతా ఒకే చోటకు చేరే అవకాశం కనిపిస్తోంది. వీరిలో పవన్ అండ్ బన్నీని ఒక చోట చూడడం చాలా ప్రశ్నలకు జవాబులు ఇచ్చేస్తుంది.