ఉత్తరాదిని చుట్టేసేందుకు అఖిల్ ప్లాన్

అక్కినేని అఖిల్ రెండో సినిమా ఆరంభానికి చాలా ఆలస్యమే అయింది. ఎట్టకేలకు క్రేజీ ప్రాజెక్టును సెట్ చేసిన నాగార్జున.. విక్రమ్ కె కుమార్ దర్శకత్వంలో అఖిల్ సెకండ్ మూవీని స్టార్ట్ చేసేశాడు. కొన్ని వారాల క్రితమే హైద్రాబాద్ లో షూటింగ్ ప్రారంభం కాగా.. హైద్రాబాద్ లో యాక్షన్ ఎపిసోడ్ ను కంప్లీట్ చేశారు. ఇంకా సర్వీసులు ప్రారంభించని హైద్రాబాద్ మెట్రో రైల్ లో షూటింగ్ జరుపుకున్న తొలి చిత్రంగా రికార్డ్ కూడా సృష్టించాడు అఖిల్.

ఇప్పుడు అఖిల్ అండ్ టీం అంతా నార్త్ ఇండియా చుట్టేసేందుకు ప్లాన్ చేసుకున్నారు. స్టోరీ ప్రకారం పలు కీలక సన్నివేశాలను ఉత్తరాదిలోనే చిత్రీకరించాల్సి ఉందని అంటున్నారు. ఆగ్రా.. అలహాబాద్.. లక్నో నగరాల్లో షూటింగ్ చేయనున్నారట. ఈ నార్త్ ఎపిసోడ్ సుదీర్ఘంగానే ఉంటుందని.. కథకు సంబంధించిన కీలకమైన ఎపిసోడ్ అంతా అక్కడే షూటింగ్ చేస్తారని తెలుస్తోంది. ఇప్పటివరకూ అఖిల్ ను ఎన్నడూ చూడని కొత్త కోణంలో చూపించేందుకు దర్శకుడు విక్రమ్ కె కుమార్ ప్లాన్ చేశాడని.. మూవీలో అఖిల్ కేరక్టర్ అత్యద్భుతంగా ఉంటుందని అంటున్నారు.

అనూప్ రూబెన్స్ సంగీతం అందిస్తున్న ఈ చిత్రానికి జున్ను.. ఎక్కడ ఎక్కడ ఉందో తారక.. టైటిల్స్ ను పరిశీలిస్తున్నారు. నాగార్జున స్వయంగా ఈ మూవీని నిర్మిస్తుండగా.. హీరోయిన్ ను ఇంకా ఫైనలైజ్ చేయకపోవడం ఆశ్చర్యకరమైన విషయం.


Like Us on Facebook : https://www.facebook.com/Tupakidotcom/