Mr.మజ్ను: ఫుల్ ఆడియో డేట్ వచ్చేసిందోచ్

అక్కినేని అఖిల్ - వెంకీ అట్లూరి కాంబినేషన్లో తెరకెక్కుతున్న చిత్రం 'Mr.మజ్ను'. ఇప్పటికే షూటింగ్ పూర్తి చేసుకున్న ఈ సినిమా రిపబ్లిక్ డే వీకెండ్ లో జనవరి 25 న రిలీజ్ కానుంది. సినిమా విడుదలకు రెండు వారాల సమయం కూడా లేకపోవడంతో 'Mr.మజ్ను' టీమ్ ప్రమోషన్స్ మొదలు పెడుతున్నారు. ఇందులో భాగంగా ఫుల్ ఆడియో రిలీజ్ కు ముహూర్తం పెట్టారు.

'Mr.మజ్ను' జూక్ బాక్స్ ను జనవరి 14 వ తేదీ ఉదయం 10 గంటలకు విడుదల చేస్తామని ప్రకటించారు. జస్ట్ ఇన్ఫర్మేషన్ మాత్రమే ఇవ్వకుండా ఈ సందర్భంలో ఒక పోస్టర్ కూడా విడుదల చేశారు. ఈ పోస్టర్ లో అఖిల్ లండన్ వీధుల్లో ఒక స్టైలిష్ స్టెప్ వేస్తూ ఉన్నాడు. బాలీవుడ్ హీరో షారూఖ్ ఖాన్ లాగా రెండు చేతులూ అలా చాపి తల వంచి నవ్వుతున్నాడు. అదేంటో తెలీదు గానీ అఖిల్ పోస్టర్లన్నీ ఇదే స్టైల్లో వైబ్రెంట్ గా ఉంటాయి. ఈసారి పోస్టర్లతో పాటుగా సినిమా కూడా బాగా ఉండాలని కోరుకుందాం.

ఈ సినిమాకు థమన్ సంగీతం అందిస్తున్నాడు. ఇప్పటికే రిలీజ్ అయిన 'ఏమైందో'.. 'నాలో నీకు' లిరికల్ సాంగ్స్ కు మంచి రెస్పాన్స్ వచ్చింది. ఫుల్ ఆడియో తో థమన్ ఎలాంటి మ్యాజిక్ చేస్తాడో వేచి చూడాలి. ఈ సినిమాలో అఖిల్ సరసన నిధి అగర్వాల్ హీరోయిన్ గా నటిస్తోంది. శ్రీ వెంకటేశ్వర సిని చిత్ర బ్యానర్ పై ఈ చిత్రాన్ని బీవీఎస్ఎన్ ప్రసాద్ నిర్మిస్తున్నారు.