తమిళనాడులో 'అఖండ' క్లైమాక్స్ షూట్..!

నటసింహ నందమూరి బాలకృష్ణ - దర్శకుడు బోయపాటి శ్రీను కాంబినేషన్ లో రూపొందుతున్న యాక్షన్ ఎంటర్టైనర్ ''అఖండ''. వీరి కలయికలో ఇంతకముందు వచ్చిన 'సింహా' 'లెజెండ్' చిత్రాలు బ్లాక్ బస్టర్స్ గా నిలవడంతో ఈ హ్యాట్రిక్ మూవీపై భారీ అంచనాలు నెలకొన్నాయి. దీనికి తగ్గట్టుగా ఇప్పటి వరకు విడుదల చేయబడిన ప్రచార చిత్రాలు - రెండు టీజర్‌ లకు మంచి ఆదరణ లభించింది. ఈ సినిమా షూటింగ్ చివరి దశకు చేరుకుంది.

'అఖండ' చిత్రానికి సంబంధించిన క్లైమాక్స్ ఫైట్ ను తమిళనాడులోని ఒక ఆలయంలో చిత్ర బృందం షూట్ చేస్తోంది. బాలకృష్ణతో పాటు ఇతర ప్రధాన తారాగణం అంతా ఈ క్లైమాక్స్ షూట్‌ లో పాల్గొంటున్నారు. ఈ హై వోల్టేజ్ యాక్షన్ సీక్వెన్స్ ని యాక్షన్ డైరెక్టర్ స్టంట్ శివ ఆధ్వర్యంలో చిత్రీకరిస్తున్నారు. ఈ క్లైమాక్స్ ఫైట్ సినిమాకే హైలైట్ గా నిలిచేలా బోయపాటి ప్లాన్ చేస్తున్నారు. బాలకృష్ణ ఈ చిత్రంలో ద్విపాత్రాభినయం చేస్తున్న సంగతి తెలిసిందే. ఫ్యాక్షనిస్ట్ మరియు అఘోరా పాత్రల్లో కనిపించి సందడి చేయనున్నారు.

ఈ చిత్రంలో ప్రగ్యా జైస్వాల్‌ మెయిన్ హీరోయిన్ గా నటిస్తోంది. శ్రీకాంత్ - జగపతిబాబు - పూర్ణ కీలక పాత్రలు పోషిస్తున్నారు. ఎస్.ఎస్. థమన్‌ సంగీతం సమకూరుస్తున్న ఈ చిత్రానికి రామ్ ప్రసాద్ సినిమాటోగ్రఫీ అందిస్తున్నారు. కోటగిరి వెంకటేశ్వరరావు ఎడిటింగ్ వర్క్ చేస్తున్నారు. మిర్యాల సత్యనారాయణ రెడ్డి సమర్పణలో ద్వారకా క్రియేషన్స్‌ బ్యానర్‌ పై మిర్యాల రవీందర్ రెడ్డి భారీ బడ్జెట్ తో ఈ చిత్రాన్ని నిర్మిస్తున్నారు. 'అఖండ' విడుదల తేదీపై త్వరలోనే క్లారిటీ రానుంది.