'రొమాంటిక్' పోస్టర్ తో పూరీ తనయుడి సరికొత్త అప్డేట్

స్టార్ డైరెక్టర్ పూరీ జగన్నాథ్ తనయుడు ఆకాష్ హీరోగా నటించిన చిత్రం ''రొమాంటిక్''. డెబ్యూ మూవీ 'మెహబూబా' ఆశించిన స్థాయిలో ఆకట్టుకోకపోవడంతో.. ఈ సినిమాపై ఆశలు పెట్టుకున్నారు. ఈ యూత్ ఫుల్ రొమాంటిక్ ఎంటర్టైనర్ కి పూరీ స్టోరీ - స్క్రీన్‌ ప్లే - డైలాగ్స్ అందించారు. పూరీ శిష్యుడు అనిల్ పాదూరి ఈ చిత్రానికి దర్శకత్వం వహించారు. అప్పుడెప్పుడో పూర్తైన ఈ సినిమాని జూన్ 18న విడుదల చేయాలని అనుకున్నారు. అయితే కరోనా సెకండ్ వేవ్ ప్రభావం వల్ల వాయిదా వేశారు. దీంతో ఈచిత్రాన్ని డైరెక్ట్ ఓటీటీలో రిలీజ్ చేస్తారంటూ రూమర్స్ వచ్చాయి. ఈ నేపథ్యంలో తాజాగా ఈ సినిమా విడుదల గురించి మేకర్స్ క్లారిటీ ఇచ్చారు.

"రొమాంటిక్" చిత్రాన్ని థియేటర్లలోనే రిలీజ్ చేస్తున్నట్లు మేకర్స్ అధికారికంగా ప్రకటించారు. అంతేకాదు ఈ సినిమాకు సంబంధించిన సెన్సార్ కార్యక్రమాలు కూడా పూర్తయినట్లు వెల్లడించారు. సెన్సార్ బోర్డ్ ఈ చిత్రానికి 'యూ/ఏ' (U/A) సర్టిఫికేట్ జారీ చేసినట్లు తెలిపారు. ఈ సందర్భంగా హీరోహీరోయిన్ల ఇంటెన్స్ రొమాంటిక్ పోస్టర్ ని చిత్ర యూనిట్ విడుదల చేసారు. త్వరలోనే ఈ సినిమా రిలీజ్ డేట్ ని ప్రకటించనున్నారు. ఈ చిత్రంలో ఆకాష్ పూరీ సరసన బాలీవుడ్ హాట్ బ్యూటీ కేతికా శ‌ర్మ హీరోయిన్ గా నటిస్తోంది. ఇది ఆమెకు తెలుగు డెబ్యూ మూవీ. ఆకాష్ - కేతికా ల రొమాంటిక్ ఫీవర్ థియేటర్లలో ఎలాంటి ఫైర్ క్రియేట్ చేస్తుందో చూడాలి.

'రొమాంటిక్' చిత్రంలో సీనియర్ నటి రమ్యకృష్ణ కీలక పాత్ర పోషించారు. మకరంద్ దేశ్ పాండే - ఉత్తేజ్ - సునయన ఇతర పాత్రల్లో కనిపించనున్నారు. సునీల్ కశ్యప్ ఈ చిత్రానికి సంగీతం సమకూర్చారు. నరేష్ సినిమాటోగ్రఫీ అందించగా.. జునైద్ సిద్దిఖీ ఎడిటింగ్ వర్క్ చేశారు. లావణ్య సమర్పణలో పూరీ జగన్నాథ్ టూరింగ్ టాకీస్ మరియు పూరీ కనెక్ట్స్ బ్యానర్స్ పై పూరీ జగన్నాథ్ - చార్మీ కౌర్ సంయుక్తంగా ఈ చిత్రాన్ని నిర్మిస్తున్నారు.