పవన్ తర్వాత చైతునే!!

ఇప్పుడు పవన్ కళ్యాణ్ కు సినిమాల మీద విసుగు వచ్చేసిందనే సంగతి అర్ధమవతూనే ఉంది. రాజకీయాలపై దృష్టి పెట్టిన పవర్ స్టార్.. సినిమాలను అన్యమనస్కంగానే చేస్తున్నాడు. ఇకపై ఇదీ ఉండకపోవచ్చని హింట్ ఇచ్చేశాడు. కానీ పవన్ కళ్యాణ్ ఎప్పుడూ ఓ ట్రెండ్ సెట్టర్. తాను ట్రెండ్ ఫాలో కానని.. సెట్ చేస్తానని తనే డైలాగ్ చెప్పి మెప్పించగల హీరో.

పవన్ చాలానే మేనరిజమ్స్.. కాన్సెప్ట్ లను తెలుగు తెరకు పరిచయం చేశాడు. ఎస్ జె సూర్య దర్శకత్వంలో రూపొందిన ఖుషీ చిత్రం.. పవన్ కెరీర్ లో ప్రాముఖ్యత గల మూవీ. ఇందులో ఇగో అనే పదం విపరీతంగా కనిపిస్తుంది. హీరోయిన్ భూమికకు ఇగో అంటాడు పవన్. కానీ ఈ మూవీని పరిశీలిస్తే.. హీరో హీరోయిన్ ఇద్దరి పాత్రలు ఈ ఇగో చుట్టూనే తిరుగుతూ ఉంటాయి. ఆ ఇగో లోంచి బైటకు ఎలా వచ్చారు.. ఎలా కలుసుకున్నారు అన్నదే ఖుషీ మూవీ థీమ్. ఆ తర్వాత ఏ సినిమాలోనూ ఇగోను ఇంతగా చూపించిన దాఖలాలు లేవు. గత వారంలో ఇగో అంటూ ఓ మూవీ వచ్చింది కానీ.. ఇగో పేరు చెప్పి అందులో చాలానే ఇరికించారు.

నాగ చైతన్య హీరో మారుతి దర్శకత్వంలో త్వరలో ఓ చిత్రం రూపొందబోతోంది. తన ప్రతీ సినిమాలోను హీరోకు ఏదో ఒక డిఫెక్ట్ ను తగిలించి కామెడీ పండిస్తున్న మారుతి.. ఈ సారి తన హీరోకు ఇగో సెట్ చేశాడట. హీరోకు ఉన్న ఇగో చుట్టూ నవ్వులు పండేలా క్యారెక్టర్ ను రాసుకున్నాడని తెలుస్తోంది. భలేభలే మగాడివోయ్ లో నానికి మతిమరుపు.. మహానుభావుడులో శర్వాకు ఓసీడీ అంటూ కామెడీ చేసిన మారుతి.. ఇప్పుడు చైతుకు ఇగో తగిలిస్తున్నాడు. పవన్ ఖుషీ తర్వాత మళ్లీ ఇన్నేళ్లకు ఇగో బేస్డ్ ఫుల్ లెంగ్త్ క్యారెక్టర్ లో కనిపించనున్నాడు చెయ్.. చైతన్య.